Taliyaha NISA C/llaahi Maxamed Cali (Sanbaloolshe) ayaa markii labaad xilkan loo magacaabay April 2017 markii uu madaxweyne dalka ka noqday Maxamed C/llaahi Farmaajo.

Lama oga cidda ku dhalisay Farmaajo inuu xilkan u dhiibay siyaasigan oo ahaa shaqsiyad muran badan ka dhalisay dowladihii hore isla markaana aan aqoon weyn u lahayn arrimaha ammaanka inkastoo muddo 2 bilood ah uu isla xilkan kasoo qabtay dowladii Xasan Sheekh, kuna baxay khilaaf uu sabab u noqday oo lagu riday xukuumadii Ra’iisal wasaare C/weli Sheekh Axmed.

Dadka yaqaan Sanbaloolshe waxay ku tilmaamaan nin hankiisa xileed uu sarreeyo isla markaana ka arradan ixtirmaanka madaxda iyo dadka la shaqeeya ayaa intii uu xikan ka qabtay dowladda Farmaajo la dareemay inuu awood badan ku leeyahay Villa Somalia.

Howgalkii xasilinta caasimadda iyo hadalladiisa qayaxan ayaa ku sigtay inay xiisad beeleed ka abuuraan Muqdisho, laakiin waxaa difaac u noqday wasiirka Amniga xukuumadda oo ah la wada aqbalsan yahay.

Waxaa mar kale soo baxay kiiska Sarkaal ka tirsan ONLF oo dowladda Soomaaliya ay u gacan gelisay Itoobiya, kaasoo Soomaali badan ay ka xumaatay si weyna hoos ugu dhigtay sumcadda dowladda Farmaajo iyo Kheyre.

Waxaa la yaab lahayd in Taliye Sanbaloolshe uu warbaahinta horteeda ku af qabtay kiiskan inuu ka hadlo ra’iisal wasaare Xasan Cali Kheyre oo la weydiiyay su’aal ku saabsan dhoofinta C/kariin Sheekh Muuse (Qalbi Dhagax).

Sanbaloolshe oo jawaabta afqabtay ayaa yiri: “Arrinka la xiriira sarkaalka la sheegay in uu ONLF yahay oo Dowladdu Wareejisay, een sidaa la socotaanba arrinkaasi waa arrin oo xasaasi ah, oo ay tahay wakhtigeeda iyo goobteeda in looga jawaabo, een anigoo afduubaaya Dowladda, waxaan jeclaan lahaa in arrintan aysan xiligan Dowladda ka hadlin”.

Markii ay intaasi dhacday ayaa Ra’iisal wasaare Kheyre isna Sanbalooshe ku raacay afduubta xaqiiqada isagoo sheegaya inuu ka xog-ogaalsan yahay isaga, taasoo caddeyn u ah in ammaanka dalka ay Farmaajo iyo Kheyre u dhiibeen Sanbaloolshe.

Ra’iisal wasaare Kheyre wuxuu yiri “Madaxda Qaranka waxaa la yiraahdaa Hay’addaha Sirdoonka ayaa u taliya, hadii uu na afduubo, isaga noo xog ogaalsan dalka amnigiisa”.

TAARIIKHDA SANBLOOLSHE OO KOOBAN

C/llaahi Maxamed Cali Sanbaloolshe, waxaa uu ku dhashay Buulobarde 1968-dii, 2011-2012-kii, waxaa uu dowladda Sheekh Sharif noqday wasiirka amniga kadib markii uu geeriyooday Col. Cumar Xashi Adan, 2013/2014: waxaa uu ahaa Safiirka Soomaaliya ee Ingiriiska, 2014-kii, dowladda Xasan Sheekh waxaa muddo 2 bil ahaa Taliyaha Hay’adda Nabadsugida , 2015-2016 waxaa kaloo uu muddo noqday safiirka Soomaaliya ee Turkiga, mar 2015-kii lagu soo daray liiska wasiirro uu soo magacaabayey Cumar Cabdirashid waxaa uu ka mid ahaa dadkii la diiday, April 2017 waxaa mar kale loo magacaabay Taliyaha Hay’adda Nabadsugida.

Dad badan ayaa aaminsan in dhaqdhaqaaqyada Sanbaloolshe ay keeni doonaan kacdoon xildhibaanada Federaalka uga hor yimaadaan xukuumadda iyo madaxtooyada Soomaaliya, sida hore u dhacay.

Faallada Goobjooge