Maanta oo ku beegan 28-ka Sebtembar waxaa dunida laga maamuusaa Maalinta Caalamiga ah ee Helitaanka Macluumaadka Guud.
Qodobka 32-aad ee Dastuurka Soomaaliya (Faqradiisa 2 iyo 3) waxay caddeynayaan helitaanka macluumaadka ay Dowladdu heyso ama xogta helitaankeeda loogu baahan yahay in xuquuq muwaadin lagu ilaaliyo.
Sidaas darteed, iyadoo dalku u jiheysanayo doorasho 2020/21 waxaa muhiim ah in madaxda Dowladda ee hadda xilka haya (Madaxweyne Farmaajo, wasiiradda iyo xildhibaannada) ama kuwa ka tagay (RW Hore Xasan Cali Kheyre) inay dadweynaha Soomaaliyeed u soo bandhigaan arrimahan:
1) Baydhabo: Dilkii 15 ruux oo shacab ah oo uu ku jiray wiil yar ee dhacay Disembar 2018.
2) Gaalkayo/Muqdisho: Qabashadii iyo dhiibistii Cabdikariin Qalbi-Dhagax ee Agoosto 2017.
3) Heshiiskii 16ka qodob ka koobnaa ee Dowladda Soomaaliya la gashay Itoobiya bishii Juun 2018 ee ay ku jirtay afarta dekedood.
4) Jawaari: Ridistii Afhayeenkii Hore ee Baarlamaanka Maxamed Cismaan Jawaari ee dhacday bishii Abriil 2018.
5) Faragelinta ciidamada Itoobiya ee doorashooyinkii Maamul Gobolleedyada 2018.
6) Baaritaankii qaraxii Soobe ee Oktoobar 2017.
7) Baaritaankii dilkii Guddoomiyihii Hore ee Gobolka Banaadir AUN Injineer Yariisow ee Luulyo 2019.
8) Heshiisyada Eritrea iyo Soomaaliya ee ku lamaansanaa heshiisyadii loo bixiyay “Isdhexgalka Geeska Afrika” ee 2018.
9) Sababihii keenay dib u dhigista dacwaddii Badda ee Soomaaliya iyo Kiinya 2019 – 2020.
10) Baaritaanka dilkii 8 dhakhtar ee ka dhacay tuulada Gololey bishii May 2020.
W/Q: Cabdalle Axmed Muumin
