C/raxmaan C/shakuur Warsame oo ka mida siyaasiyiinta, horena u soo noqday wasiir ayaa si qoto dheer uga hadlo weerarkii dadka lagu laayay ee ka dhacay Degaanka Bariire.
Wuxuu ka hadlay qaabka loo yareyn karo qasaaraha ka dhasha dagaalada looga horjeedo argagixisada, wuxuuna soo jeediyay tallooyin ku saaban qaabka looga baaqsan karo qasaare la mid kii ka dhacay Bariire.
HOOS KA AKHRISO QORAALKA C/RAXMAAN C/SHAKUUR
Waxaan tacsi u dirayaan dadkii rayadka ahaa ee shalay lagu dilay deegaan ka tirsan Bariire. Waxaa ku jiray qaar aan aqaano, kuna aqaanay wanaag iyo samo ka talin. Allaha u naxariisto sabar iyo Iimaana Allaha ka siiyo eheladii iyo qoysaskii ay ka baxeen.
La dagalaanka argagexisadda la mid ma ahan dagaalkii la aqoon jiray (conventional war). Waa dagaal aan la aqoon xuduudda cadawga, tirada ciidankiisa, nooca hubkiisa, taagtikada dagaalkiisa iyo taakulaynta saadkiisa. Waxaasoo dhan waxaa ka sii daran waa dagaal dadwaynaha lagu dhex dirarayo. Hadaba guusha dagaalka kuma xirna oo keli ah awooda ciidanka, tirada hubka iyo taaktikada dagaalka ee waxay ku xiran tahay kalsoonida iyo taageeraada laga helayo dadwaynaha.
Waa in uu jiraa hanaan ay dawladu ku qaadayso masuuliyada kuna muujinayso sida ay uga go’an tahay ilaalinta dadkeeda. Waxaana lagama maarmaan in la sameeyo habraaca hawlgal oo looga taxadarayo khasaaraha dadka rayadka ah. Waana in la helo qaab daryeel, daawayn iyo magdhaw ku heli karaan dadka rayadka ah ee hawlgalada ciidanka wax ka soo gaaran.
Waa in ay jirto istaraatiijiyad tan hataan jirta ka duwan ee dhinaca warbaahinta iyo xiriirka dadwaynaha ah ee ku aadan hawlgalka ciidanka xooga dalka iyo kuwa ajnabiga ah ee Alshabaab ka dhanka ah.
Si hadaba loo yareeyo khasaaraha dadka rayadka ah loona kasbado kalsoonida shacabka waxaa laga maarmaan ah in la helo waax Ciidanka Xooga Dalka (CXD) u qaabilsan xakamaynta khasaaraha dadka Rayadka. Waaxdaas waa in ay heer qaran iyo gobol yeelato hoos tagtana Xafiiska Madaxweynaha, maadaama uu yahay Taliyaha Gud ee CXD.
Waaxda waa in ay awood u yeelataa in ay dabagal ku samayso khasaaraha soo gaara dadka rayadka ah, maarayso shillalka, baaritaan ku samayso eedaha hawlgalada ka yimaada, taageerana siiso dadka ay khasaaraha soo gaareen. Waana in ay raadiso xog dhab oo tafatiran ka hor inta aanan hawlgalka la samayn. Arrinkani wuxuu gacan siinayaa qorshaha hawlgal ee Ciidanka Xooga Dalka ee Aragagexisada ka dhan ka ah.
