Mudane Cumar C/rashiid Cali Sharma’arke waxaa mar labaad loo magacaabay Ra’iisal wasaaraha Soomaaliya 17kii Bishan Disember 2014, waxaana ra’iisal wasaarihii saddexaad ee dowlada uu madaxweynaha ka yahay u magacaabay Xasan Sheekh Maxamuud oo hogaamiya dowlad rasmi ah oo Soomaaliya ay yeelato muddo 22 sano ah kadib.
Cumar wuxuu xilkan qabanayaa iyadoo labadii mas’uul ee uga horeysay jagada iyo madaxweynaha khilaaf iyo dagaal siyaasadeed oo qaraar dhex maray, isla markaana kala qeybsanaan weyn ka dhex jirto Baarlamaanka ansixiyay magacaabidiisa 24-ka Disember 2014. Wuxuu xilka la wareegayaa iyadoo waqtiga u haray dowladda oo dhan ee laga doonaya inay dalka doorasho ka dhacdo ka yar yahay 2 sano. Iyo iyadoo dadka Soomaaliyeed iyo Beesha caalamka ku dhow yihiin inay ka rajo dhigaan shaqsiyaadka isu bedela hogaanka xukuumaddaha la dhiso iyo madaxtooyada.
Marka la fiiriyo xaaladaha ku xeeran Ra’iisal wasaaraha cusub, waxaa si fudfud loo odorosi karaa inuusan ka miro dhalin doonin hiigsiga cusub iyo waxa laga sugayo dowladda ee loo doortay baarlamaanka iyo madaxweynaha, laakiin mar waliba rajadu waa mid iska taagan oo quusta u dhow.
Arrimaha ugu waaweyn ee waxqabadka uga baahan Cumar C/rashiid waxaa kamida:
1. Dhismaha Golaha wasiirada cusub
Howha ugu adag bilowgaba waxay noqon doontaa sidii Ra’iisal wasaaruhu u dhisi doono Golihiisa wasiirada. Ka sokow in xildhibaan waliba doonayo jago wasaaradeed, waxaa haddana sameysmay isbaheysiyo kala duwan oo culeys ku haya Ra’iisal wasaaraha susub.
2. La shaqeynta madaxweynaha iyo saaxiibadiis
Tani waxay ahayd dhibaatada ugu weyn ee ka hor timid labadii ra’iisal wasaare ee jagada waayay, waxayna maareyn uga baahan tahay Ra’iisal wasaaraha cusub oo laga yaabo inuu ku soo beegmay xilli ay qolada madaxweynaha ku xeeran ku tabaaloobeen dagaalkii ay la galeen C/weli Sheekh. Si uga badbaado madaxweyaha iyo kooxdiisa waxaa Cumar laga rabaa inay isaga iyo madaxweynaha kala qortaan sidii ay u wada shaqeyn lahaayeen, haddii taas la waayo waxay noqon doontaa in beesha caalamka soo dhex gasho oo qorshe “Road Map” cusub.
3. Howl adag iyo Hiigsigsa cusub 2016
Haddiiba xukuumada uu dhiso kalsooni ka hesho Baarlamaanka waxaa Cumar C/rashiid laga rabaa qabashada howl is dul saaran oo 2016 la doonayo in dalka la gaarsiiyo doorasho iyo dib u dhis hay’adaha dowladeed iyo Federaalka. Cumar C/rashiid oo hore xilkan oo kale isaga casilay markii ay isku dhaceen madaxweynihii Sheekh Shariif, isagoo lagu eedeeyay waxqabad la’aan, waxaana lagu xantaa inuusan shaqo badneyn, balse aanu ka liidan ra’iisal wasaare Saacid.
4. Dhismaha Dowlad goboleedyada iyo hirgelinta Federaalka
Hirgelinta Federaalka waxay u socotaa qaab aanay ogeyn natiijada ka dhalan doonta cid kasoo hartay madaxweynaha iyo saaxiibadiis oo xiriir adag iyo qorshe la wada laba ka mida maamulada dhismaya, mid socdana lug weyn ku leh, xitaa maamulkii uu dhinaciisa ka dhisay Cumar C/rashiid ee Jubba maanta wuxuu isbaheysi la leeyahay madaxweynaha mana aha kii uu ogaa.! Waxaa kaloo xusid mudan in Maamulka loo sameynayo gobolada dhexe uu noqday dab hoos ka nool oo xilli waliba qarxi kara, iskuna diidan yihiin madaxweyne Xasan Sheekh iyo Puntland, waana arrin weyn Cumar looga fadhiyo inuu wax ka qabto.
Xukuumada soo socota ee uu hogaankeedu hayo Cumar C/rashiid waxaa la saar doonaa culeys aan yareyn, waxayna dusha u ridan doontaa fashilkii soo bilowday tan iyo markii uu xilka qabtay Xasan Sheekh Maxamuud haddii aanay qorshe cad iyo waxqabad la imaan. Saadaasha ugu rajo fiican ee laga bixin karo fursada guusha xukuumadani waa mid shaki ku jiro, waxaase la arki doonaa sida arrimahaas oo dhan uu u wajaho Cumar C/rashiid oo shaki la’aan dhaxlay xafiiskii uu ka tegay 2010, kiiyoo ka culus shaqo iyo mas’uuliyadba.
Faallooyinka Goobjooge.com
[ad name=”HTML”]
