Waxaa taariikhda Soomaalida laga soo wariyay in aay jiri-jireen farsamooyin iyo xeelado farabadan oo bulshada lagu kala qeybiyo, si kala qeybsanaantaas dhexdeeda looga raadiyo faa’iido siyaasadeed.
Aragtidaas guracani waxay daaran-tahay ama salka la gashaa dhaxalkii gumeeysiga ee udub-dhexaadkiisu ahaa “QEYBI OO XUKUN”, ama qoryaha iskugu dhiig si aay iskugu dhiig-baxaan.
Aragtidaani gumeeysiga laga soo minguuriyay ayaa sifiican uga shaqayn jirtay gayiga Soomaaliya. Kuwii gumaystuhu barbaariyay ayaa umada Soomaaliyeed u qeybiyay Kacaan iyo Kacaan-diid.
Kuwa ku suntan Kacaan-diidka kolka xil loo magacaabo si aay xilka u sii haystaan ama kuraasta ugu sii fadhiyaan waxaa jiray SHARDI AMA SHURUUD lagu xiraayo in uu fuliyo, hadii kale waxaa loogu hanjabi-jiray in masuulkaasi xilkaas awalba macmalka ahaa waayi-doono.
Shardigaas ama shuruudaas waxaa ka mid ahaa in xilhaayuhu sida caruurta ku hadaaqo: Kooxdaasi waa Qaran-dumis, kuwaasi waa gumeeysi kalkaal, hebel iyo hebelna waa gumeeysi kalkaal.
Waxaan hubaa in aay wali nool yihiin dad Soomaaliyeed oo in badan sheekooyinkaas raqiiska ah ka dhegeystay Raadiyo Muqdisho, kuwa xiligaas xilbeenaad haayay oo hadalo loo soo meeriyay ka aqrinaaya Raadiyo Muqdisho….
Qofkii qoraalkaan dood ka qaba haku noqdo Keydka Raadiyo Muqdisho….
Biyo dhaca qoraalkan gaabani waa in la ogaado inay siyaasada Soomaaliya ee gurracan inay hide iyo dhaqanba u leedahay in kuwa haaya xilalka macmalka ah in inta loo yeero lagu dhaho:
WARYAA SIDAAS IYO SIDAAS U HADAL HADII KALE XILKA AYAAN KAA QAADAYAA, WAXAANA U DHIIBAYAA HEBEL OO U DIYAAR AH IN UU SIDAAS IYO SIDAAS IYO KASII DARANBA U HADLO, EE HADALKAAN MA DHAHEE MISE XILKA AYAAD IIGA DEGEEYSAA?
Ujeedadu waa in lakala dilo masuulka xilka haaya iyo bulshada gaar ahaan degaanka uu Qaranka ku matalo….Waa farsamada lagu hanto xilhaaye, xilkiisa lagu maamulo xafiiskiisa, asaga oo aan talo iyo tusaale midna ku lahayn talada Xafiiska.
Hadaba dadka Soomaaliyeed hadii ay maqlaan nin ku hadlaaya “HADAL AAN-AHAYN NIN-WEYN HADALKIISA”, ha ogaadeen in ninka hadlaaya innaanu ku hadlayn garasho iyo aragti uu asagu shakhsiyan leeyahay ee waxaa ka dhex hadlaaya ama fariinta usoo dhiibay waa ninkii markii hore u magacaabay xilka macmalka ah.”
“WARYAA SIDAAS IYO SIDAAS U HADAL HADII KALE XILKA IIGA DEG, SOOMAALIYA WAA KU DUNTAY” Ee Soomaaliyey taariikhda wax ka baro, xilka iyo deeqdana Alle ayaa bixiya e, sharafta iyo karaamada yaan lagu iibsan xil-beenaad aan haba-yaraatee lahayn wax macno ah oo loo sharaf-beelo.
Ragoow nin aan kuu furi-doonin yaanu kuu rarin….
Ragow: bil laba ah laguma guureeyo, ee inta aadan hadal, waxna falin, yeelo filasho dheer.
Soomaaliya Guul: Aamiin
W/Q: Dr. Hassan Sheikh Ali
29 November 2020
