Iyadoo ay ka harsantahay in ka yar 48 sacadood doorashada madaxtinimada ee Soomaaliya ayaa waxaa soo if baxaaya saadaalo kala duwan oo muujinaya sida ay musharixiintu ugu kala horeeyaan tartankan,
waxaana shaki la’aan ah in musharixiinta isbedel doonka ah ay yihiin kuwa safka hore kaga jira in loo saadaaliyo in midkood uu ku guuleysan doono doorashada Madaxweynenimo, taasoo meesha ka saareysa hanka hogaanka dowladda uu waqtigeeda dhamaaday ee ah inuu talada dib ugu soo laabto.
Haddaba, waxaa xarumaha Musharixiinta ugu cad-cad tartankani ka socda ololihii ugu dambeeyay ee lagu soo jiidanayo xildhibaanada labada aqal ee Baarlamaanka, balse waxaa hubaal ah in ay sii yaraaneyso inta musharax oo la filayo in ay heli karaan codad ka badan 20-meeyo, taasoo micnaheedu yahay in illaa afar musharax oo qeybsada codadka intooda ugu badan ay kasoo gudbi doonaan wareega koowaad, waxaana halkaasi laga filan karaa in musharaxiinta waxqabadkooda horey loo tijaabiyay in ay fursadooda hoos u dhici doonto marka la gaaro wareega labaad.
Musharaxiinta la filayo iney wareega labaad soo galaan ayaa waxaa la saadaalinayaa inuu ka mid noqdo Musharaxa Cabdulqaadir Cosoble oo ka mid ah wejiyada cusub ee kooxda isbedel-doonka, islamarkaana la xasuusan yahay in doorashadii 2012-dii uu wareegii kowaad ka soo gudbay, halka musharixiinta kale ee lagu tirinayo iney lasoo gudbaan ay yihiin kuwo jago Madaxweyne ama mid Raysulwasaare soo qabtay, kuwaasi oo aysan xildhibaanada labada Aqal ee baarlamaanku u arag in ay wax weyn soo kordhin doonin maadaama horay loo soo tijaabiyay.
Cabdulqadir Cosoble Cali oo Ka mid ah musharaxiinta ugu cad cad oo loo saadaalinayo inuu tartanka doorashada Madaxweyne ku guuleysto ayaa la arkayay inuu shirar aan kala go’ laheyn uu la lahaa xildhibaanada baarlamaanka maalmihii aynu kasoo gudubnay, iyadoo xildhibaanada labada Aqal qaarkood ay sii sheegayaan in aanu wax shaki ah uga jirin in Musharaxa Cabdulqaadir Cosoble uu noqon doono madaxweynaha la doorto ee Soomaaliya marka la gaaro 8-da Bishan ee loo balansan yahay.
W/Q: Xasan Maxamed Shiino
