Adiga oo aan qaylin oo aanan xanaaqin, wax yar fur qolka xaqiiqda ee maskaxdaada ku dhaxyaal. Waxa aad sheeganee Qaran, xilal iyo maamullo, is weeydii: madaxweeynayaasha (governatoorayaasha), kan Puntland ma tagi karaa Qandala iyo Galgala, kan Galmudug ma tagi karaa Xarardheere, kan Hirshabeele ma tagi karaa Adan Yabaal, kan Koofur Galbeed ma tagi karaa Qansaxdheere, kan Jubbaland ma tagi karaa Jammaame, dowladda dhexe ma tagi kartaa degmooyinka caasimadda qaar, kii Xamar looga yeero waa in dayaarad loo diro. Midkoodna ma wada tagi karo dhulka uu sheeganayo in uu wada maamulo.
Haddii aad Xamar ka baxdo adoo u socda Afgooye waxaa jidka jooga ciidankii K/galbeed waxa lagu weeydiinaa 45$ oo ah (tre mistrale )cashuurta baabuurka 3 bilood, haddii aad Afgooye ka timaado sidoo kale tii Xamar ayaa lagu weydiinayaa. Haddii aad Balcad aaddo sii socod iyo soo socodba waxaa lagaa rabaa 45$ cashuurta 3 biloodlaha ah ee Hirshabeele iyo tii Xamar.
Waxaa Gaalkacyo ku dagaalay Galmudug iyo Puntland. Jaziira waxaa wada xukuma Banadir iyo K/Galbeed. Sidoo kale Matabaan waxaa wada sheegta Hirshabeele iyo Galmudug. Degmooyinka Bakool waxaa wada sheegta xukunkooda Jubbaland iyo K/Galbeed. Xuduudaha gobollada waxay ku dhow yihiin in Visa looga gudbo. Hotellada goballada waxaa yaal foom aad ku buuxinee magaca qabiilkaaga.
Waxa aad arkee Janaraal xakuma 6 asgari oo istaaf kiisa ah oo kaliya. Safiir aan miisaaniyad lahayn oo shaxaad ku nool ah. Xildhibaan aan ka bixi karin Hotelka ama Hooygiisa si uu u tago golaha shacabka illaa uu helo cid waddada gudbisa.
Haddii aad furtay Qolka xaqiiqda ee maskaxdaada ku dhaxyaal, walaaloow/walaaleey, sidaa qaran ma ku nahay.
Iga raali ahoow haddii uu kuu furmi waayay qolkaagu.
Qore: Prof. Yahya Amir
