Waxay ahaayeen koox kasoo jeeda bulshada rayidka ah, oo dhinaca waxbarashada heer fiican ka gaartay, waxay isugu jireen macalimiin, aqoonyahano iyo saaxiibo, balse si aan la fileyn siyaasadda u soo galay.
Waxay dhiseen xisbi siyaasadeed la baxay PDP xilli aan xisbi ka jirin dalka, waxay is tuseen inay talada halka ugu sareysa tegi karaan, qorshahoodii markii hore loo arkayay inuu mustaxiil iyo riyo maalmeed yahay ayaa u toosay, wuxuuna musharaxoodii u noqday madaxweynaha Soomaaliya 10 Septembar 2012.
Isla markii ay talada la wareegeen si weyn ayaa dadku u soo dhoweeyeen, waxaana loo arkayay aqoonyahano wax weyn ka bedeli kara xaaladda murugada leh ee Villa Somalia ka taagneyd, waxaana loo dhigay xaflado soo dhoweyn iyo damaashaad isugu jira.
Waxyar kadib waxaa la dareemay inay is kooxeysanayaan taladana isku koobayaan, waa ka sii dareen oo waxaa loogu magac daray DAMUJADIID, sanad kadibna arrintiina waxay noqotay inaysan waxba dhaamin kuwii ka horeeyay…!
Hankii laga qabay waa jabay, waxayna ku mashquuleen musuq iyo lunsiga hantida umadda, heshiisyo qaraabo-kiil ah oo lagula wareegay halbowlayaashii dowladda iyo ku takrifal awooddii dalka. Qorshahooda ugu weyni waxay ka dhigeen sidii ay kursiga u heysan lahaayeen, waxayna iloobeen wixii loo doortay iyo waajibaadka loo igmaday.
Waxay gaareen heer ay hantida umadda ku maalgelinyaan in dib loo doorto, waxayna wax waliba u sameeyeen sidii ay kursiga ugu soo laaban lahaayeen. Way is ajareen, waana kedsoomeen, waxayna u qaateen inaan dadkaanu damiir ku harin oo dhaqaalihii laga qaaday iyaga lagu laaluushi karo si mar kale ay qoorta u surtaan xarigii lagu marjin lahaa….!!
Kuma quusan digniintii hore loo siiyay ee uu doorashada guddoonka Baarlamaanka ku fashilmay kabiirkoodii weynaa ee waxay is tusiyeen haddii ay Doolar kordhiyaan inay dib u hanan karaan Villa Somalia, siina wadan karaan hogaankoodii afartii sano ee keli-noolaha ahaa.
Waxaa miir ugu horeysay oo waagu ku baryay galab Arbacaad 8-dii Febraayo markii ay rumeysan waayeen halka dabeyshu u socoto.. waxay maqleen “Maxamed C/llaahi Farmaajo……Maxamed C/llaahi Farmaajo…… … Maxamed C/llaahi Farmaajo…… “. Waxaa u muuqatay inay talo faro ka baxday, sidaas ayuuna daadkii ula tegay.
Boqortooyadii Damujadiid ee 4-ta sano iyo 4-ta bilood jirtay waxay ku burburtay afar saacadood gudahood, waxaana neef weyn ka soo fuqday dhamaan shacabkii iyo masaakiintii ku hoos dhibanaa xukunkii kooxdii LAMOOD NOQONSE WEYDAY..
Waxaa ku soo xigay inuu is casilay kabiir kale oo kooxdan ka mid ahaa, madaxna ka ahaa maamulka Galmudug sabab kastaba ha ku dhacdee, taasoo soo afjartay awoodii siyaasadeed ee kooxdii Damjadiid oo dhan…. ha is weydiin wixii hanti iyo juhdi ku baxay xilkan danbe… laakiin waxa dhacay oo dhan waxaad ku ilowdaa INAY WAX KASTA U DHACEEN SI AYSAN FILEYN.
AR FARMAAJO II GEEYA…. iyo damaashaad ayaa lagu waashay ilaa dadkii la joojin waayay,… Isbedelka la doortay maaha shaqsi iyo koox lagu bedelay mid kale… ee waa mid niyad ah oo lagu doonayo in looga baxo DULMIGA Villa Somalia soo daashaday.
Madaxweynaha iminka talada qabtay iyo kooxdiisa waa inay wax ku qaataan wixii dhacay… una dhaqmaan sida loo heyso oo loo soo dhoweeyay, waana inay ogaadaan haddii ay Dulmigii hore ku socdaan inay mari doonaan jidkii kuwii ka horeeyay.. oo wax ku waano qaatay ay yar yihiin.
HADDII AAD QORMADA AKHRISAY NALA DHAGEYSO HEESTA: DULMI DOONOW DULMI DIIDAAN ARAGNEE… DULMI DIIDOW DULMI DOON HA ISKU NOQON
FAALLOOYINKA Goobjooge
