Siyaasiga C/raxmaan C/shakuur Warsame oo ka mid ahaa wasiiradii dowladii KMG ahayd, soona noqday musharax madaxweyne ayaa farriin culus u diray hoggaana dowladda Federaalka.
C/raxmaan C/shakuur oo ka mida siyaasiyiinta qunyar socodka ah oo sida dadban u tilmaama gaabiska ka jira hoggaanka dowladda uu hoggaamiyo Maxamed C/llaahi Farmaajo ayaa markan u muuqda inuu si toos ah xaaladda siyaasadeed ee dalka ka jirta dusha u saarayo hogaanka dowladda Federaalka, isagoo aan sax iyo khalad midna ku tilmaamin tallaabooyinka dastuurka kasoo horjeeda ee ay qaadeen madaxda maamul Goboleedayda Soomaaliya.
FARRIINTA HOOS AK AKHRISO
Labadii bilood ee ina dhaaftay ugu yaraan
6 xero ciidanka Xoogga Soomaaliyeed ayey Alshabaab weerareen, askartii ku laayeen, hubkiina ka furteen, kuwaasoo ku yalaay Buulaguduud, Beledxaawo, Bariire, Ceelwaaq, Kalabayrka iyo Yeed. Ilaa iyo hada wax war ah lagama maqal Dawlada.
Shalay waxaa baaqday shirkii Dastuurka oo ay qaadaceen Gudiga Madaxabanaan ee dib u eegista Dastuurka iyo Gudigii kor joogtaynta u qaabilsan dib u eegista Dastuurka labada Gole ee Baarlamaanka iyo Aqalka Sare. Waxaa sidoo kale qaadacay Dawlad Goboleedyadii.
Waxaa mushaar la’aan ka mudaaharaaday macalimiintii Jaamacada Ummada. Waxaan weli la xalin oo Baarlamaanka gudi u saaray dhiibistii Qalbidhagax iyo falceliskii dadwaynaha ee arrinka ka dhashay.
Waxaa muuqata in Dawlad goboleedyadii iyo Dawlada Federaalka ah ku kala aragti duwan yihiin arrimaha Amniga, Siyaasada iyo dhaqaalahaba. Waxaana daliil u ah arrinka Khaliijka, sharcinimada Madaxeyne Xaaf, daabacada shilinka Soomaaliga ah iyo meelmarinta Hindisaha Heshiiska Amniga Qaran ee shirkii London lagu soo saxiixay.
Waxaa lagu wadaa in beri shir ay Dawlada ka maqan tahay Kismaayo uga furmaya madaxda Dawlad Goboleedyada oo ka walwalsan xiriirka sii xumaanaya ee iyaga Dawalda Federaalka u ah u dhexeeya. Beesha Caalamka ayaa sidoo kale aad uga walaacsan arrimaha Amniga iyo siyaasada ee sii murgaya.
Waxaa taagan mushkilo dhab iyo crisis baaxad leh. Dawlada kama dhuuman karto arrinkaan iskama dhega tiri karto, eedana uma saarin karto cid kale. Kismaayo waa fursadii xaalada lagu dejin lahaa ama geyn karta meel aan laga soo qaban karin ee waa in dawladu masuuliyada qaadataa, gaar ahaan hogaanka la doortay.
