Wasiirka Caafimaadka Turkiga oo faahfaahin buuxda ka bixiyay Furitaanka Isbitaalka Digfeer & kharashka ku baxay

Wasiirka Caafimaadka dalka Turkiga Mehmet Muezzinoglu oo ka mida wafdiga madaxweynaha Turkiga ee Berito booqan doona magaalada Muqdisho ayaa markii ugu horeysay faahfaahin ka bixiyay isbitaalka dhimaha Digfeer oo hadda loo bixiyay Isbitaalka Recep Tayyip Erdogan, kharashka ku baxay, shaqaalaha ka shaqeyn doona iyo qaabka loo maamuli doono.

Wakaalada Wararka oo soo xigatay wasiirka ayaa sheegay Axadda beri si rasmi ah ay u furi doonaan isbitaal tababar iyo baaris caafimaad ah, isbitaalka  oo ku fadhiya dhul gaaraya 13,500-square-mitir wuxuu yaala  200 sariirood, waxaana maalgelisay hay’adda horumarinta caalamiga ah ee Turkiga (TIKA).

Soomaaliya iyo Turkiga ayaa heshiis hore u saxiixday kaasoo dhigaya in isbitaalka si wadajira uga shaqeeyaan, iyadoo Wasaaradda Caafimaadka Turkiga ay bixineyso dhaqaale isbitaalku ku soco 5-sano ee ugu horeysa iyo shaqaale caafimaad oo xirfadleyaal ah, xilligaas kadibna wuxuu ku wareegi doonaa isbitaalka Soomaaliya.

Isbitaalka sida qorshuhu yahay waxaa lagu tababari doonaa 36 howlwadeeno caafimaad oo Soomaali sanadkiiba. kharashka isbitaalka ku baxaya waxaa lagu qiyaasay 135.7 Milyan oo doolar, Turkiga ayaana bixinaya 85.6 Milyan oo doolar oo ka mida lacagtaasi shanta sano ee soo socota. Shaqaalaha Isbitaalka ayaa gaaraya 52 Turki ah iyo 91 Soomaali ah oo kala qaabilsan qeybaha maamulka, Dhaqtarada, agaasime qeybeed iyo maamulayaal dhinaca dhaqaalaha ah. Halka ammaanka ay gacanta ku hayn doonaan 42 Soomaali ah iyo 5 Turki ah.