Xildhibaan C/raxmaan Maxamed Xuseen (Odowaa) ahaana wasiirkii hore ee arrimaha Gudaha dowladii Xasan Sheekh ayaa markii ugu horeysay afka furtay, isagoo ka hadlay hoggaanka dowladda Soomaaliya iyo balanqaayadii uu sameeyay xilligii doorashada.
Mudane Odowaa ayaa is-weydiiyay balanqaadyadii uu doorashada ku galay Maxamed C/lllaahi Farmaajo iyo waxa ka qabsoomay, wuxuuna qoraal uu soo dhigay bartiisa Facebook ku sheegay in balanqaadyadii ay WAR iska noqdeen.
HOOS KA AKHRISO QORAALKA XILDHIBAAN ODOWAA
Balanqaadkii 8-da Febraayo
Maalmahaan waxaa aad la ii weydiiyaa ”maxay u fuli waayeen balanqaadyadii Doorashada, maxaase qaldan?“. Jawaabteydu waxa ay aheyd “wax fudud oo hal jawaab leh ma ahan”.
Su’aal 2aad ayaa la igu celiyaa oo ah qof walba markuu xilka doonayo aad ayuu u yaqaana dhibaatada Soomaliya ka jirta xalkana u hayaa, maxaa is badala markii xilka la helo ama lagu guuleysto?
Wax is badala ma jiraan ee waxaa jirta laba arimood oo aad iyo aad isaga keena qaldan:
1- waa midda musharaxiinta jeediyaan marka kursiga loo tartamayo. Waxaa la yiraahdaa (what): maxaa qaldan, maxaase la rabaa in la qabto? Labadaas qof walba oo Soomali ah si fudud ayuu u sharixi karaa. Waxaa qaldan wax walba ( siyaasadda, amaanka, dhaqaalaha, awood qaybsiga, iyo weliba xukun wadaag la’aanta). Waxaa la rabaa in intaas la xaliyo. Waa fududahay in la sheego cilada lana balan qaado xalkeeda.2- Aan u imaano markii xilka lagu guuleysto waxa lagaa rabo ma ahan what oo ah maxaa qaldan ama maxaa la saxaa ee waxa ay su’aashu isku badalaysaa (how) ama qaabkee ayaa loo xalinayaa ama loo gaarayaa jidka la rabo in la gaaro.
Meeshaan waa meesha waysadu nooga jabto hadii aan siyaasiyiin nahay ileen shalay waxa aan sharaxeynay oo aan kusoo tartan galnay waxa ay ahaayeen (what), ee marnaba la iskama wareysan sidee ama qaabkee (how).Hadii aan marka 8 February ku fiirino labadaas su’aal tan hore waa middi la sharaxay oo ay dadku (Xildhibaanadu) ugu codeeyeen Madaxweynaha talada haya, lakiin midda hadda sideed bilood ka dib noo muuqata waa su’aasha labaad ee ah qaabkee.
Ilaa hadda qaabkaasu kama muuqdo amaanka, siyaasadda, dhaqaalaha xiriirka dibadda iyo wadanimadii muuqatay markii xilka la raadinaayay oo aan Qalbi Dhagax la gacan galin.Marka soo uma eka maahmaahdii Soomaliyeed ee aheyd (Balani Waa War) hadii balanqaadyadii 8 Febraayo ka horeeyay aan waxba laga heyn, walibana aan jidkooda la hayn.
Guul iyo gobonimo.
