Dowladda Kenya waxaa ay shaacisay go’aankeedu ku aadan muran xuduudeedka badda ee nagala dhaxeeya.
Wasiirka arimaha dibadda Kenya, Monica Juma, oo shir jaraaid qabatay ayaa sheegtay in dalkeeda aanu ‘hal inch’ uusan uga tegay dal kale, oo dabcan Somaliya ay ula jeeday.
Juma waxaa ay intaa ku dartay in ay jawaab waafi ah/ faahfaasan ay Somalia ka sugayaan. Raali gelin waa in ay qeyb ka ahaataa jawaabta, ayay ku dartay.
Wasiirka arimaha dibadda waxaa ay tilmaantay in dhul intaa ka yar dalalka qaar ku dagaalaamaan.Kenya in ay haatan is xakameynayso ayay xustay.
Go’aankan ka soo baxay Kenya ayaa yimid kadib kulan uu madaxweyne Uhuru Kenyatta la qaatay golaha wasiirada Kenya.
Mar haddii kulan uu Uhuru Kenyatta shir gudoominayay go’aankaas ka soo baxay, waa muuqata in Kenya mowqifkeedu cad yahay.
Sabtidii Kenya ayaa soo erisay safiirka Somalia u fadhiyay Kenya, una yeertay safiirkooda Muqdisho ka fadhiyay. Waxaa go’aankaas loo arkayay mid ay gun dheereyn, balse hadda Kenya waa cadeysay mowqifkeeda.
Aamusnaan dheer kadib dowladda Somaliya waxaa ay ka jawaabtay eedeymihii Kenya ee ahaa in Somaliya ay London ku xaraashtay dhulbadeedkii lagu muransanaa ee dacwadiisu weli maxkamadda caalamigu go’aan ka gaarin.
Dowladda Somaliya ayaa meesha ka saartay tuhunka Kenya ee ahaa ‘xaraashka’ dhulbadeedka lagu muran san yahay, ayada oo sheegtay in London lagu soo bandhigay sahanka cabirka saliidda Somaliya ceegaagta.
Jawaabta oo weliba aad looga fiirsaday, ereyo xanaf laga dhowrayna lagu qoray, dowladda Kenya uma cuntamin. Waa tan hadda weli dalbanaysa in jawaab dheeraad ah la siiyo, kuna hanjabeysa cunaqabateyn.
Haddaba dowladda Somaliya maxaa la gudboon mar haddii jawaabteedii hore lagu qanci waayay, haddana loogu hanjabayo cunaqateyn iyo in dagaal.
Marka hore dowladda Somaliya waa in ay arintan u aragtaa dan qaran(national interst) sida ay Kenyaba ugu aragto, .
Marka xigta waa in kulan deg deg ah xukuumaddu isugu
timaaddaa, kulankaasna si fican loogu gorfeeyaa arrinkan kadibna la qaataa go’aan natiijo kasta oo ka timaadda diyaar loo yahay.
Sidoo kale, dowladdu Somaliya waa in Kenya ay dareensiisaa in ay tahay dal madaxbanaan oo aan loo yeerin Karin.
Inkastoo ciidamo Kenyaan ahi oo dowladda caawiya dalka ka joogaan, qaxooti badana dalkeeda daadsan yihiin, haddana ‘soor quureed lama qaato’
Ogow Somaliduba dhaqaale badan bay dalkaas geliyaan oo uu ugu horeeyo ganacsiga qaadka oo aynaan wax kale uga bedelan.
Somaliya waa in ay muujisaa in xaaladda oo xumaataa dal kaliya aanu dhibeyn ee laba ‘darafle’ arinti tahay.
W/Q: Mohamed Osman New York
