Dhawaan magacaabistii Ra’iisul-wasaare Roobe kadib waxaa soo baxday su’aal ah cidda xilka ku wareejinaysa Ra’iisul-wasaaraha cusub, ma ra’iisul wasaarihii xukuumadii kalsoonida lagala noqday mudane Xasan Cali Kheere mase kusimihii uu madaxwaynaha magcaabay mudane Mahdi Guuleed?
Hadaba, si su’aashan aan uga jawaabno si sharci ah waxaa lama huraan ah in aan su’aal kale is waydiino oo ah haddii xukuumadda kalsoonida uu baarlamaanku kala noqdo inta Ra’iisul-wasaare cusub laga soo magacaabaayo ma Ra’iisul-wasaarihii ee xilka lagala noqday ayaa sii shaqaynaaya mise waxaa sharci ahaan banaan in xubin ka mid ah xukumadiisi kusima ahaan loo sii magacaabo inta Ra’iisul-wasaare cusub laga soo magacaabaayo?
Ugu horreyn in la magacaabo kusime ka tirsan xukuumaddii baarlamaanku kalsoonida kala laabtay waxay ahayd arrin baalmarsan sharciga gaar ahaan Dastuurka Federaalka KMG qod. 97aad farqadiisa 4aad oo caddayneeso in dhammaan xubnaha golaha wasiiradu ay isla wada dhacaayaan hadii Ra’iisul-wasaarahu istiqaalo keeno ama xilka qaadis lagu sameeyo, sidoo kale qod.103aad ee Dastuurka KMG ah wuxuu jiddaynayaa in dhammaan xubnaha xukuumada ay noqonayaan xil gaarsiiyayaal sii wadaaya hawl maalmeedka xafiisyada.
Sidaas awgeed waxaa sharci ahaan lama huraan ah in Ra’iisul-wasaarihii hore Xasan Cali Kheere uu xilka ku wareejiyo Ra’iisul-wasaaraha cusub mudane Maxamed Xuseen Rooble sababaha soo socdo awgood:-
1. Sida Dastuurku tilmaamaayo gaar ahaan qod.103aad waxay ahayd in Ra’iisul-wasaare Kheere uu shaqada sii wado ilaa laga soo magacaabaayo Ra’iisul-wasaare cusub.
2. In sigaar loo magacaabo kusime ka mid ah xukuumadii kalsoonida lagala noqday waxay ahayd arrin baalmarsan dastuurka gaar ahaan qodobadii aan hore usoo tilmaanay.
3. Ma jirto cid iyo goob uu ku wareejiyay Xasan Cali Kheere xilkii Ra’iisul-wasaaranimada ee horay uu uhaayay, xitaa kusimihii uu madaxwaynuhu magacaabay ee dastuurka baalmarsanaa kuma wareejin wax xil ah.
Asbaabahan awgood waa in ra’iisul wasaarihii hore mudane Xasan Cali Kheere uu xilkii uu umadda u haayay goob fagaar ah kula wareejiyaa Ra’iisul-wasaaraha cusub.
W/Q: Qareen: Daahir Maxamed Cali
