Wasiirkii hore ee Arrimaha dibadda Yuusuf Garaad Cumar, haddana ah Ergayga gaarka ah ee Madaxweynaha waqtigiisu dhammaaday (Maxamed C/llaahi Farmaajo) u qaabilsan Geeska Afrika, Badda Cas iyo Gacanka Cadmeed ayaa shan su’aal ka keenay bannaanbax ay musharxiinta Mucaaradka shaaciyeen inuu Jimcaha ka dhacayo Muqdisho.
Yuusuf Garaad oo ku afeeftay inuu ra’yigiisa shaqsiya ah ka hadlayo, isla markaana aanu cidna kala tashan fikerkiisa ama u difaaceynin ayaa ayaa u muuqda inuu diidan yahay bannaabaxa ay ku baeqeen musharixiinta Mucaaradka wuxuuna soo jeediyey shan su’aal oo uu sheegay in mid kasta ku saabsan tahay, halis hadda laga baaqsan karo sida uu yiri, waxayna kala yihiin:
1- Marka laga soo tago xoogsatada faraha badan ee danyarta ah oo qaarkood waayi doono dakhligooda maalinlaha ah, waxaa jiri karta halis amni oo aan la sahashan karin. Dadweyne ay horkacayaan Madaxweynayaal hore, oo goor iyo goob la shaaciyay oo fagaare ah ku ballansan, Allah kama dhigee, sow halis uma aha qaraxyada iyo weerarrada noocyada kale ah ee ka dhaca Muqdisho?
2- Haddii taas laga nabadgalo, waxaa jirta halis labaad oo amni. Waa haddii ciidanka murashixiinta ilaalinaya iyo ciidanka waddooyinka fadhiyaa ay kala shakiyaan. Waa haddii uu midkood uu falalka midka kale u fasirto in ay yihiin daandaansi u baahan in laga falceliyo ama ugu yaraan la is hortaago.Labada ciidan waxay ka wada tirsan yihiin ciidanka Qaranka, dhar isku nooc ah ayay ku lebbisan yihiin, waxay fuushan yihiin gaadiid isku nooc ah, waxayna sitaan hub iyo rasaas isla mid ah.Murashixiintu ma hayaan si ay u baajin karaan in labada ciidan uu dhex maro iska horimaad hubeysan?
3- Labadaa qodob waxay igala culus yihiin ujeeddada Bannaanbaxa. Amniga kama baxsana oo waxaa lagu jiraa xilli uu Muqdisho ku laba kacleeyay Covid-19. In dad badani ay goob isugu soo baxaan miyaaneey sahli karin sii faafidda cudurkan laayaanka ah?
4- Aan u soo laabto danta ay murashixiintu ka leeyihiin bannaanbaxa.Maaddaama la og yahay in Bannaanbuxu aanuu shacabka ka imaan ee ay Murashixiintu ku dhaliyeen, abaabulayaanna, ma muuqataa si uu wax uga beddeli karo mowqifyada hadda la kala joogo?
5- Waxaas oo dhami waxay dhacayaan iyada oo uu maanta billowday shir hordhac u ah shir kale oo laga yaabo in uu isla Jimcaha ama maalmaha xiga ku dhawaaqo si’ iyo goor la isla oggol yahay oo doorashadu ay qabsoonto.Ugu dambeyn, sow ma mudna in maalmo fara ku tiris ah laga warsugo wadahadlka uu hordhiciisu maanta ka billowday Baydhowa?
Fekerka Danjire Yusuf Garaad ayaa soo baxay iyadoo ay bannaanbaxa olole weyn ku fureen taageerayaaha baraba bulshada ee Madaxweynaha, isla markaana dacaayado loo adeegsaday warbaahinta qaarkeed ay socoto.
Dadka naqdiyey ee ka hor yimid qoraalka Yusuf Garaad waxaa ka mida:
“Qoraalkaan ma aheyn inuu qoro ku qaybsanaha arrimaha badda cas ee dowladda federaalka. Wuxuu ka mid yahay qoraallada abuura su’aalaha dad badan qabaan ee jawaabaha loo la’yahay…” – Mohamud Uluso
“WAX WALBA WAXAA KA MUHIIMSAN IN WADANKA UU HELO FREE AND FAIR ELECTION, LKN YAAN LA BANAANBIXIN DHIBAATO IN AY IMAATAA LAGA YAABAA WAXAAN U ARKAA WADANKA HAKU SII JIRO “STATUS QUO” OO AH MID AAN DALKA IYO DADKABA U WANAAGSANEYN.” -Abdinasir Ismail ZOLA-
“Danjire xushmad Ayaan kuu hayaa lkn waxaa kaa muuqata inaad marmaraiiyo u raadinayso dowladda waqtigeeda dhammaaday, banaanbaxyadi hore u dhacay oo uu ugu dambeeyey midki 2 usbuuc ka hor hadaad ka digi lahayd waan kuu garaabi lahayn lkn warkaagu hadda qbasha malaha afeefna waxba kuu tari mayso ee waxaad sii talaalatay Tiitiin.‘ -Mohamed Abduwahab Abdullahi-
“Hadal lagaa filaayay ma aha. Muwaadin walba xaqbuu u leeyahay in uu si nabad ah u mudaaharaado. Farriintaan mid la mid ah haddaad hore u sii dhigi lahayd oo aad kula hadleysid hoggaanka Gobolka Banaadir ee shaqadoodaba ka dhigtay in aay dadka soo bixiyaan, Waan kuugu garaabi lahaa. Af Daboolan Dahab.” -Ismail Osman-
