Ciidamada Dowladda ee Magaalada Jowhar ayaa la sheegay inay gacanta ku dhigeen askarigii ka danbeeyay dilkii xalay magaaladaasi loogu geystay Taliyihii Nabad Suggida Shabellaha dhexe C/weli Ibraahim.
Ciidamada ayaa saaka ninkan k soo qabteen duleedka Magaalada Jowhar oo uu ku dhuumaleysanaayay. Afhayeenka Maamulka Gobolka Shabellaha Dhexe Daa’ud Xaaji Cirro ayaa sheegay in dembiilaha gacanta lagu hayo, lana keenay Magaalada Jowhar.
Afhayeenka ayaa sheegay in maxkamad la soo taagi doono oo lagu qaadi doono sharciga maxkamada ciidamada Qalabka sida, maadaama uu dilay Taliyihii Nabad Suggida Gobolka Shabellaha Dhexe.
Al Shabaab ayaa isla markiiba sheegatay inay ka dambeysay dilka Taliyihii Nabad Suggida Gobolka Shabellaha Dhexe, waxaana askariga dilka geystay uu hore uga tirsanaa Alshabaab, iyadoo la filayo inuu weli xiriir la lahaa.
Taliye C/weli Ibraahim Maxamed ayaa 2014-ka loo magacaabay Taliyaha Ciidanka Nabad Suggida ee Gobolka Shabellaha Dhexe.
Goobjooge.com
