Xildhibaannada Baarlamaanka Federaalka Soomaaliya ayaa maanta magaalada Muqdisho ku yeeshay kulan ka mida kalfadhigooda caadiga ah iyadoo ka dooday qaabka loo jiheynayo siyaasadda dalka ee hiigsiga sanadka 2016ka.
Ugu horeyn kulanka maanta waxaa Xildhibaannada loo akhriyey qoraal uu kasoo baxay xafiiska Hab-dhowrka Golaha Shacabka kaasoo gebi ahaanba lagu joojiyey fasax la siiyo Xildhibaannada mudada ka harsan xiritaanka Kalafadhiga 6-aad ee Baarlamaanka, iyadoo oo qoraalkaasi xildhibaanada ka hor akhriyey Xoghayaha Guud ee Golaha Shacabka C/kariin Xaaji Cabdi (Buux).
Xildhibaannada Baarlamaanku ayaa sidoo kale dhageystay warbixin uu guddi hoosaadka Baarlamaanka u qaabilsan kasoo tala bixinta siyaasadda ugu haboon ee loo jiheynayo geedi socodka 2016ka kasoo diyaariyey shirkii Madaxda Soomaaliya iyo beesha caalamka ee 29-30kii July lagu qabtay magaalada Muqdisho waxaana warbixintaasi Xildhibaannada ka hor akhriyey Xildibaan C/risaaq Cusmaan Jurille.
Xildhibaannada waxay warbixintaasi kadib bilaabeen inay ka doodaan siyaasadda ugu haboon ee loo jiheyn karo geeddi socodka 2016ka, qaarkood waxay Xildhibaanadu sheegeen inay lagama maarmaan tahay in la helo wadatashi ballaaran oo la xiriira nooca doorashada dalka ka dhaceysa marka la gaaro sanadka 2016-ka.
Guddoomiye ku xigeenka Koowaad ee Golaha Jeylaani Nuur Iikar oo shirka Guddoominayey ayaa gebagebadii kulanka Xildhibaannada ku wargeliyey in Sabtiga la geli doono akhirnta saddexaad ee Hindise Sharciyeedka Xeerka Isgaarsiinta Qaranka,
Kalfadhiga lixaad ee Baarlamaanka ayaa lagu wadaa inuu dhowaan soo xirmo haddii aanay dhicin in la kordhiyo, iyadoo ay hor yaallaan sharciyo fara badan oo kala duwan.
Goobjooge.com
