Isimada Maamul Goboleedka Soomaaliyeed ee Puntland ayaa ku kala qeybsamay shirka Odayaasha Dhaqanka Soomaalida uga socda magaalada Qardho ee Gobolka Bari, waxaana shirkaasi mid siyaasadeed uu dano gaara laga leeyahay ku tilmaama Isimada Gobolka Nugaal oo war cad kasoo saaray Magaalada Garowe.
Shirka ay isimada Puntland ku yeesheen Garowe ayaa laga soo saaray qoddobo si weyn loogu diidan yahay Shirka kale ee Duubabka Soomaalida qaarkood uga socda degmada Qardho oo uu furay Madaxweynaha Puntland C/weli Gaas.
Isimiada Garowe ku shiray waxay shirka Qardho ku tilmaameen mid siyaasadeed oo lagu kala qaybinayo isimada Puntland, waxayna soo saareen qodobo ay ka mid yihiin:
1. Waxaa madashada fadhiga, isimada Puntland ee Garowe u mahadcelinayaan dhammaan isimadii iyo waxgaradkii sida joogta ah nooga lasoo xiriirayay deegaanada kala duwan ee Somalia, si ay xaqiiqda shirkaasi u ogaadaan, kuna qancay inaan shirkaasi ahayn mid dhaqan kaliya ah
2. Waxaana hay’adaha Qaramada Midooba iyo madaxda dowladda Federalka ee hanka siyaasadeed ee 2016 ku jiro, ugu baaqaynaa inay faraha kala baxaan arrimaha dhaqanka ee Puntland
3. Isimada madasha Garowe, waxay isla garteen cawaaqib xumada ka timaada shirkaas, waxaa mas’uuliyadeeda iska leh, ciddii abaabusha ama dhaqaalaysay
War-saxaafadeedka Odayaasha Garowe waxaa ku saxiixnaa 21 oday dhaqameed iyo Isim oo kala ah;
1. Islaan Ciise Islaan Maxamed Islaan Muuse
2. Garaad Cabdullaahi Cali Ciise
3. Boqor Cabdullaahi Axmed Cali
4. Beeldaaje Ismaaciil Beeldaaje Yaasiin
5. Suldaan Siciid Maxamed Maxamud (Irbad)
6. Islaam Axmed Islaam Maxamud
7. Garaad C/llaahi Dacar (Tamaam)
8. Ugaas C/qaadir Cilmi (Filig)
10. Suldaan Nuur Suldaan Maxamed Aadan
11. Garaad Maxamed Cilmi Shirwac
12. Suldaan Bashiir Muuse (Konte)
13. Suldaan Siciid Maxamed (Garaase)
14. Suldaan C/llaahi Saalax Cumar
15. Islaan Mahad Islaan Maxamud Cilmi
16. Suldaan Maxamud Xasan Cumar
17. Suldaan Maxamed Suldaan Axmed
18. Islaan Maxamed Maxamud Cali
19. Garaad C/rashiid Garaad Ismaaciil
20. Islaan Maxamud Islaam Yaasiin
21. Suldaan Axmed Bashiir Ducale.
Shirka Qardho oo uu gogosha fidiyay Boqor Burhaan Boqor Muuse ayaa waxaa ka qeyb galaya duubab dhaqameed Soomaaliyeed oo isaga yimid degaanada Soomaalida.
Arrintan ayaa soo shaac bixineysa sida Isimada Puntland ugu kala qeybsan yihiin xaaladda kala guurka ah ee dalku galay, waana xilliyada Siyaasadda iyo dhaqanku is dhex galaan.
Goobjooge.com
