Dalka Thailand ayaa lagu guuleystay in iyadoo nool lasoo saaro koox kubadda cagta ah iyo tababarrahooda oo muddo 9 maalmood ah la waayay markii God ay marayeen ay biyo badan ku shubmeen oo ay ku xayirmeen.

Kooxaha samata bixinta Thailand ayaa dadaal ugu jirtay badbaadinta 12 wiil iyo tababarahoodii koox kubadda cagta ah, waxaana ugu danbeyn la helay xalay oo la gaaray godkii ay ku jireen markii ciidamada dalkaasi iyo Injineero ay qodeen godad waaweyn si loo gaaro goobta Bohosha ee ay ku xayirnaayeen kooxda caruurta ah iyo tababrraheeda, dalka Thailand.

Muddo 9 maalmood ah ayaa la la’aa. Muuqaallo sawirro iyo Fiidiyoow oo laga soo duubay ayaa muujinaya markii ay quusayaal British ah ay la kulmeen carruurtaas oo diif ay ka muuqatay, kuwaasoo ku sugnaa meel qallalan laakinse ay biyo ku hareereysnayeen.

Kooxaha samata bixinta ayaa iminka go’aan ka gaaraya in ay kooxdaas soo dhex mariyaan marinnada ay biyuhu ka buuxaan, ayadoo la isticmaalayo qalabka quusidda, ama ay sugaan ilaa inta ay tabartooda uga soo noqonayso oo biyahana dibadda loo soo bam garaynayo.