Madaxweynaha Soomaaliya Xasan Sheekh Maxamuud ayaa Garoonka Diyaaradaha Muqdisho kula hadlay ciidamo sanado badan tababar ugu maqnaa dalka Eritrea, isagoo siiyay fasax muddo Bil ah.
Ciidamadan oo laga soo daad gureeyay dalka Eritrea ayaa Xarunta Ciidamada Cirka ee Xoogga Dalka Soomaaliyeed la isugu geeyay, wuxuuna madaxweynaha kula dardaarmay inay qaataan fasax si ay qoysaskooda u soo arkaan.
Madaxweynaha ayaa u sheegay cutubyadii maanta dalka dib ugu soo laabtay, inay shacabka Soomaaliyeed rajo badan ka qabaan inay ka qeyb-qaataan cirib-tirka Al-shabaab, isagoo ugu baaqay inay fuliyaan ballantii ahayd inay soo laabtaan fasaxa kadib.
Ciidamada dib ugu soo laabtay dalka ayaa ka kooban qeybaha ciidamada Dhulka, Cirka iyo Badda, waxayna isugu jiraan qaar sannado badan ku maqnaa Ereteriya iyo cutubyo sannadkan bilowgiisa loo diray oo dhammeystirtay tababarkooda.
