Kulan ay maanta xarunta Wasaaradda Gaashaandhigga ku yeesheen taliyaha ciidamada xoogga dalka Soomaaliya Jeneraal Maxamed Aaden Axmed iyo saraakiisha ugu sarreysa AMISOM ayaa looga hadlay qorshe dagaal cusub oo lagu qaadayo kooxda Alshabaab si sanadkan gudihiia looga xoreeyo degaanada gacantooda ku harsan.
Taliyaha ciidanka xoogga dalka Soomaaliya ayaa cadeeyay in sanadkan 2016-ka uu u noqon doono sanadii howlgallada howlgallada lagu baacsanayo Ururka Al-Shabaab.
“Kulankan muhiimka ah ee aynu maanta halkan u fadhino ujeedkiisu waa in wadajir loogu diyaar garoobo dib u xoreynta goobaha dhiman ee cadowgu joogo. Waxaan isla garanay AMISOM in Sanadkan 2016 Soomaaliya oo dhan laga waayo meel ay argagixiso ka taliyaan”ayuu yiri Taliyaha Xoogga dalka.
Kulanka ayaa waxaa taliyaha ciidamadda ku weheliyey Abaanduulaha xoogga dalka Soomaaliyeed iyo saraakiil kale, wuxuuna shirkani qeyb ka yahay kulamo is daba joog ah oo maalmihii u danbeeyey u dhexeeyey wasaaradda gaashaandhigga iyo hawl-galka nabad ilaalinta Soomaaliya.
Howlgalka ugu weyn ayaa la filayaa inuu ka bilowdo degaanada Jubbooyinka, kaasoo loogu magac daray “Jubba Corridor” waxaana hadda socda ciidamo ku qulqulaya gobolada Gedo iyo Jubada hoose oo dagaalka qeybta ugu weyn ka qaadanaya.
