Guddoomiyihii hore ee Gobolka Banaadir oo hadda hogaamiya xisbi siyaasadeed Maxamuud Axmed Nuur [Tarsan] oo ay la socdaan odayaal dhaqameedyo ayaa maanta tegay magaalada Beledweyne ee gobolka Hiiraan, waxaana garoonka ku soo dhoweeyay mas’uulihiinta, Odayaasha dhaqanka iyo ururrada dhalinyarada gobolka Hiiraan.
Tarsan ayaa socdaalkiisa ku sheegay inuu ujeedkiisu yahay inay ka qeyb qaataan wadatashiyada ka socda magaalada Beledweyne ee ku saabsan dhismaha maamulka Gobollada Hiiraa iyo Shabeellada Dhexe.
Tarsan ayaa siweyn u amaanay doorka Ugaas Xassan Ugaas Khaliif iyo mowqifka adag ee uu markiiba iska taagay ismari-waaga ka taagan arrintaan iyo shirarka Wada-tashiga ah ee uu uga baaqay bulshada reer Hiiraan.
Wafdiga Tarsan ayaa la sheegay inay ku booqdeen hoyga uu magaalada Beledweyne ka degan yahay Ugaas Xasan Ugaas Khaliif oo ay ka wadahadleen xaalada gobolka Hiiraan. Waxaana la sheegay inay Tarsan iyo wafdigiisa ku biireen shirka wadatashi ee ka socda magaalada Beledweyne.
Goobjooge.com
