Ururka Al-shabaab ayaa ku soo biiray muranka ka taagan Kiiska Sarkaalka ONLF ee dowladda Soomaaliya u gudbisay dalka Itoobiya.
War qoraal ah oo kaso baxay xafiiska warfaafinta Xarakada Al-Shabaab ayaa lagu sheegay in Al-Shabaab iska fogeyneyso hadalka kasoo yeeray kooxda Farmaajo, kaasoo lagu sheegay in Shaqsiga lagu magacaabo Cabdi Kariim Sheekh Muuse “Qalbidhagax” uu iskaashi la lahaa Al-Shabaab.
Al Shabaab waxay beenisay inaysan haba yaraatee wax xiriir ah aysan lalaheyn C/kariim Sheekh Muuse, waxaana, War-saxaafadeedka Al-Shabaab intaas ku daray: “Ma jiro mana jirin wax xiriir ama iskaashi ah oo ka dhexeeyay ama dhexmaray Cabdi Kariim Qalbi-Dhagax ama Jabhada uu ka tirsanaa ee ONLF iyo Xarakada Al-Shabaab. Waa war aan sal iyo raad toona lahayn oo kooxda ridada ah ee Farjaamo ay ku doonayso inay qiil uga dhigato falkii ay ku keceen ee ahaa inay Qalbi-Dhagax u gacan geliyeen Itoobiya..”.
Warka Alshabaab ayaa ahaa kii ugu degdegta badnaa ee ay uga jawaab bixiso mowqif kasoo baxay dowladda Soomaaliya iyadoo ka faa’iideysaneysa xaaladda siyaasadeed ee xilligan jirta.
