Maxkamada Derajada koowaad ee ciidamada qalabka sida ayaa maanta xukun dil toogasho ah ku riday askari ka tirsanaa ciidamada xoogga dalka oo lagu helay inuu dil bareer ah u geystay wiil dhalinyaro ah, degmada Kaxda ee magaalada Muqdisho.
Dable Xoogga Dalka Maxamed Cismaan Maxamed Nuur ayaa lagu soo eedeeyay dilka marxuum Cabdiraxmaan Cabdullaahi Cismaan oo uu ku dilay garoon lagu ciyaaro kubadda cagta oo ku yaalla degmada Kaxda 3 January 2020, markii uu halkaasi u tegay inuu garab siiyo wiil ay isku hey ahaayeen.
Kiiska dilka ah ayaa dhacay markii askarigan Maxamed Cismaan Maxamed Nuur oo aan ka mid aheyn dadka ku ciyaarayay garoon ku yaal degmada Kaxda, dhinaca Xoosh uu garab siin ugu yimid wiil ay isku heyb yihiin, kadibna si aan ka fiirsasha laheyn uu rasaas ku furay goobtii, kuwaas oo sababay in laba xabbad oo ka mida ay galaafteen nolosha Marxuumka C/raxmaan C/llaahi.
Gaashaanle Sare Xasan Cali Nuur Shuute guddoomiyaha Maxkamadda Darajada Koowaad ee Ciidamada Qalabka ku dhawaaqay go’aanka Maxkamadda oo ahaa in Maxamed Cismaan Maxamed Nuur lagu xukumo Dil toogasha ah, taasi oo ah qisaasta Marxuum Cabdiraxmaan Cabdullaahi Cismaan. Xukunsanaha ayaa haysta fursad 30-cisho ah oo uu ku dalban karo Rafcaan.
