Wararka ka imaanaya magaalada Muqdisho ayaa sheegaya in madaxweynaha Jubba Axmed Maxamed Islaam (Axmed Madoobe) uu ka tegay Muqdisho, dibna ugu laabtay magaalada Kismaayo.
Wafdi uu horkacayo Axmed ayaa maanta ka duulay Garoonka Diyaaradaha Magaalada Muqdisho, Wuxuuna goor dhoweyd dib ugu laabtay xarunta maamulkiisa ee magaalada Kismaayo.
Madaxweynaha Jubba ayaa dalbaday inuusan sii joogi karin Muqdisho oo maalmaha ciida uu la qaadanayo dadkiisa iyo shacabka ku nool Magaalada Kismaayo, kadib markii la isku mari waayay shirkii Madasha.
Madaxweyne Axmed Madoobe ayaa u sheegay madaxda Dowladda Federaalka inuu dib ugu soo laaban doono Muqdisho Talaadada ama Arbacada.
Shirka Madasha ee Muqdisho oo la filayay inuu noqdo kii ugu danbeeyay ayaa khilaaf xoogan hareeyay iyadoo la isku mari la’ yahay qaab dhismeeda Aqalka Sare.
Goobjooge.com
