Ciidamo Kenyaan ah oo afka soo duubtay, isuna ekeysiiyay Alshabaab ayaa khaarijiyay sarkaal ka tirsan Ciidamada Milateriga Soomaaliya markii ay ku weerareen gurigiisa degmada Ceelwaaq.
Ciidamada Kenya ayaa saaka dilka kula kacay Dhamme Maxamed Aadan Yuusuf oo ka tirsanaa milateriga Soomaaliya, kana mid ahaa saraakiisha sare ee aqoonta leh, waxayna wararku sheegayaan in ciidamada Kenya ee u soo tallaabay dhinaca Soomaaliya ay wateen dhowr gaari iyo calanka Alshabaab, afkana ay soo xirteen.
Iska hor imaad dhex maray ciidamada milateriga Soomaaliya ee ku sugnaa Ceelwaaq ayay dadka degaanka sheegeen in loo qaatay Alshabaab, balse markii ay dileen sarkaalka ay galeen gudaha Kenya.
Saraakiil ka tirsan ciidamada Milateriga Gobolka Gedo ayaa sheegay in Kenya ya sameysatay ciidamo gaara oo ay dooneyso inay ku khaarijiso saraakiisha Soomaaliyeed ee ka hor yimaada damaceeda dhul balaarsiga ah.
