Ciidamada Itoobiya ee Liyuu Police ayaa si qorsheysan weriyeyaal uga afduubtay Somaliland kadib markii loogu yeeray xaflad caleemo saaro oday dhaqameed ah magaalada xuduudka ku taala ee Wajaale kadibna ciidamo Liyuu Police ah ay kaxeysteen weriyeyaasha.

Falkan ayaa dhacay shalay iyadoo 5 weriye oo ka socday telefishanada Soomaalida ee ka howlgala Somaliland loogu yeeray arrintaasi iyadoo markii danbe ay ciidamada afduubteen kadibna la geeyay xalay magaalada Jigjiga.

4 weriye ayaa saaka la sii daayay, waxaana ay Itoobiyaanku la hareen weriye u shaqeeya telefishanka Horn Cable oo lagu magacaabo Mukhtaar Nuur, oo la sheegay inaan la ogeyn meel uu ku sugan yahay  iyo sababta loo qafaashay.

Guddoomiyaha ururka Saxafiyiinta Somaliland ee SOLJA MAxamuud Cabdi Jaamac (Xuuto) ayaa sheegay in dawladda Itoobiya ay sidoo kale hawada ka saartay telefiishanka HCTV. Wuxuuna ugu yeeray Somaliland inay arrintaasi soo farageliso.

Goobjooge.com