Dowlad kale oo reer Yurub ah ayaa lagu dhawaaqay inay aqoonsatay baasaboorka Soomaaliya, siiba qeybihiisa Diblomaasiga iyo Shaqada ee ay qaataan saraakiisha iyo madaxda dowladda Soomaaliya.
Safiirka Soomaaliya u fadhiya Midowga Yurub Cali Saciid Faqi oo warkan laga soo xigtay ayaa sheegay in Dowladda Holland ay si rasmi ah u aqoonsatay in dalkeeda lagu geli karo Baasaboorka Soomaaliga gaar ahaan kan Shaqaalaha iyo kan diblomaasiyiinta, iyadoo ay hore dalal kale oo Yurub ah u aqoonsadeen.
“Waxaan aad ugu faraxsanahay inaan idin la wadaago in dowladda Netherlands ay aqoonsatay Baasaboorka Diplomaasiga iyo kuwa Service-ka laga soo bilaabo May 15 2019, Baasaboorada la aqoonsaday waxaa laga soo bilaabay kuwa la bixiyay 2014-ka” ayuu safiirka bartiisa ku qoray, waxaa kaloo warkan barteeda ku faafisay Hay’adda Socdaalka iyo Jinsiyadaha Soomaaliya.
Dhowaan ayay ahayd markii dalalka Belguim & Luxembourg ay aqoonsadeen Baasaboorada Diblomaasiga iyo shaqada Soomaaliya.