Warbaahinta Dowladda Soomaaliya ayaa shaacisay in hoggaamiyeyashii Alshabaab ee Gobollada Bay iyo Gedo ay isu dhiibeen dowladda.
Horjoogihii Kooxda Alshabaab ee Gobolka Bay ninka lagu magacaabo Macalin Geedoow Aadan Abuukar ayaa laga soo xigtay inay Alshabaab ka goosteen isaga iyo hoggamiyihii Alshabaab ee gobolka Gedo Cabdiraxmaan Fiilow, isagoo sheegay inay isku fahmi waayeen Alshabaab joojinta dhibka ay ku hayaan bulshada Soomaaliyeed.
Horjooge Geedoow ayaa sheegay inay aqbaleen baaqii Madaxweynaha Jamhuuriyada Soomaaliya Mudane Maxamed C/llaahi Farmaajo ee ahaa inay Alshabaab isaga soo baxaan Horjoogayaasha iyo Maleeshiyaadka ka barbar dagaalama kooxdaasi, islamarkaana ay diyaar u yihiin ka qeyb qaadashada dagaalka ka dhanka ah Alshabaab.
Uga dambeyn waxaa uu sheegay inay heystaan isaga iyo Horjoogihii Alshabaab ee Gobolka Gedo Fiiloow ciidan xooggan oo Alshabaab ay isaga difaacaan, isagoo intaa ku daray in Alshabaab ay yihiin Khawaarij dhiiga dadka banaysatay, muda 8 bil ahna uu taagnaa khilaafka kala dhaxeeya Argagixisada Alshabaab.
