Wararka laga helayo magaalada Muqdisho ayaa sheegaya inuu is casilay guddoomiyihii Guddiga Taakuleynta ciidamada ee uu xalay Magacaabay Madaxweyne Farmaajo.

Gen. Jaamac Maxamed Qaalib ayaa la sheegay inuu istiqaaladiisa u gudbiyay Madaxweyne Farmaajo isagoo ka cudurdaartay xilka cusub ee uu Madaxweyne Maxamed C/llaahi Farmaajo u magacaabay.

Madaxweynaha Soomaaliya ayaa xaflad ka dhacay Dugsiga Sare ee Booliska Muqdisho uga dhawaaqay Guddigan oo la sheegay inuu dhaqaale u ururinayo ciidmada Qalabka sida, waxaase dhacday in guddoomiyaha Guddiga oo hore u ahaa Guddoomiyihii guddiga Doorashada Somaliland, kana tirsanaa Isbaheysigii Asmara ee maxkamadaha islaamiga inuu xilkan iska casilo.

Gen. Jaamac Maxamed Qaalib ayaa ku sugnaa xafladii looga dhawaaqay magacaabidiisa, isagoo garab taagnaa madaxweyne Farmaajo.