Waxaa maanta oo Jimce macluumaad dheeraad ah laha helay kooxdii calooshood u shaqeystayaasha ahayd ee weerarka ku qaaday ee Arbacadii khaarijisay Madaxweynihii dalka Haiti.
Booliska Haiti ayaa shaaciyey in kumaandooska hubeysan ee mas’uulka ka ahaa dilkii madaxweynihii Haiti Jovenel Moise, ay ka koobnaayeen 26 reer Kolombiya ah iyo labo Mareykan ah oo asalkoodu yahay Haiti.
Taliyaha Booliska dalka Haiti ayaa sheegay tirada kooxda dilka fulisay iyo dalalka ay kasoo jeedaan. “Waxay ahaayeen calooshood u shaqeystayaal kumaandoos ah oo gaaraya 28; oo ay ku jiraan laba Mareykab ah iyo 26 reer Kolombiya ah, oo fuliyay howlgalka lagu dilay madaxweynaha” ayuu yiri Taliyaha Booliska Haiti oo qabtay shir jaraa’id, isagoo xusay in labada Mareykan la qabtay. marka lagu daro 15 reer Kolombiya ah, halka saddex reer Kolombiya ah la dilay, sideed kalena wali baxsad ku jiraan.
Madaxeyne Moyes oo 53 jir ah ayaa ladilay xaaskiisana waa la dhaawacay, kadib markii koox hubeysan ay weerareen gurigiisa oo kuyaala Port-au-Prince Arbacadii.
Gacan ku dhiiglayaasha oo aad u hubeysnaa ayaa weerarray guriga madaxweynaha ee ku yaalla buuraha soo eegaya caasimada 1-da subaxnimo ee Arbacada waqtiga maxaliga ah.
Moyes wuxuu ku dhintey Gurigiisa, halkaas oo jirkiisa lagu arkay 12 meel rasaastu jirkiisa ka daloolisay.
Xaaska Madaxweynaha oo da’deedu ahayd 47-jir Martin Moyes ayaa lagu dhaawacay weerarka, waxaana loo duuliyey gobolka Florida ee Mareykanka, halkaas oo caafimaadkeeda la sheegay inuu yahay mid halis ah, laakiin deggan.
