Ra’iisul Wasaaraha Xukuumadda xilgaarsiinta Soomaaliya Maxamed Xuseen Rooble ayaa noqday mas’uulkii ugu sareeyay ka qeyb galay Gogosha tacsida Allaha u naxariistee madaxweynihii hore marxuum Cali Mahdi Maxamed.
Rooble ayaa saxiixay buugga tacsida, wuxuuna la kulmay qoyska iyo qaraabada marxuumka, guddigii tacsida iyo odayaasha dhaqanka ee ka shaqeynaya tacsida marxuum Cali Mahdi Maxamed.
“Waxaan Soomaali oo dhan, qoyskii iyo eheladiisa uga tacsiyeynayaa geerida naxdinta leh marxuum Cali Mahdi Maxamed, Madaxweynihii hore. Waxaan Ilaahey uga baryayaa in uu qabriga u waasiciyo, aan ducada u badinno in uu ilaahey naxariistii janno geeyo” ayuu yiri Ra’iisul Wasaare Maxamed Xuseen Rooble oo hadal kooban ka jeediyay goobta.
Ra’iisul Wasaaraha ayaa u mahadceliyay guddiyadii Aaska Qaran, Qoyska iyo duubabka dhaqanka ee sida wanaagsan uga shaqeeyay aaska madaxweynihii hore marxuum Cali Mahdi Maxamed, isagoo shacabka Soomaaliyeed ka codsaday in ay u duceeyaan marxuumka.
