Nin ka mida caddaanka xagjirka ah ee Cunsuriga Mareykanka ayaa toogasho ku laayey dad ka badan 20 qof, kadib markii uu rasaas ku furay xarun ganacsi oo ku taalla Gobolka Texas ee dalka Mareykanka.
Falkan oo ka dhacay xarunta loo dukaameysi tago ee shirkadda Walmart, kuna taalla magaalada El Paso ee gobolka Texas, dalka Maraykanka, waxaa ku dhintay ugu yaraan 20 qof, waxaana ku dhaawacmay 26 qof oo kale, kadib weerarka uu qaday nin 21 sano jir ah oo lagu magacaabo Patrick Crusius, kaasoo war uu hore ugu qoray baraha bulshada ku sheegay inuu ka horjeedo dadka Hispanic-ga loo yaqaan oo qabsaday degaankiisa.
Ninka ayaa la xiray kadib markii uu booliska goobtaasi ku sugnaa isu soo dhiibay, waxaana falkan uu noqday kii ugu dhiigga badnaa ee ka dhaca dalka Mareykanka sanadkan 2019-ka. Madaxweynaha Mareykanka Donald Trump oo arrintan ka hadlay ayaa ku tilmaamay mid aad u fool xun, wuxuuna tacsi u diray dadkii waxyeelada soo gaartay, balse sida caadadda u ah ma cambaareyn caddaanka xagjirka ah ee isaga taageera.
