Wararka laga helayo magaalada Muqdisho ayaa sheegaya in ganacstada xaafado ka mida magaalada Muqdisho ay bilaabeen inay diidaan lacagta shilin Soomaaliga.
Dadka degaanka ayaa soo sheegay in xaafadaha qaarkood iyo ganacsatada suuqyada ay diideen qaadashada laacagta shilin Soomaaliga markii saaka ay fureen ganacsiyadooda, iyadoo ganacsatada sarifka ay kordhiyeen qiimaha sarifka Doolarka ee lagu bedelanayo Shilin Soomaaliga.
Arrintan ayaa laga soo weriyay xaafadaha degmooyinka Dharkeynley, Yaaqshiid iyo Kaaraan oo dadweynaha ay saaka ka war heleen inay jirto diidmo bilow ah oo lacagta shilin Soomaaliga lagu diidayo.
Ganacsatada qaarkood ayaa diidaya inay wax ku iibiyaan lacagta Soomaaliga iyadoo aanay jirin sabab cad oo arrintan ka dambeysa, waxayna hore arrintan uga dhacday labadii maalmood ee ugu danbeysay magaalooyinka Gaalkacyo iyo Jowhar, halka magaalada Beledweyne ay gebi ahaan ka istaagtay lacagta Shilin Soomaaliga.
Ganacstada qaarkood ayaa ku doodaya in lacagta cusub ee ay sheegtay in dowladda Soomaaliya ay soo daabaceyso ay uga sii dartay xaaladda, waxaana laga cabsi qabaa inay sarifka doolarka uu cirka isku shareero.
