Ra’iisal Wasaaraha Xukuumadda Soomaaliya Mudane Xasan Cali Kheyre ayaa dalab culus hordhigay xafiiska Q/Midoobay ee Soomaaaliya kadib kormeer uu maanta ku tegay xarunta isku xirka gurmadka Abaaraha u qaabilsan Qaramada Midoobay ee Muqdisho.
Ra’iisal wasaaraha ayaa warbixin ka dhageystay qaar ka mid ah Hay’addaha gacanta ku haya xog-uruurinta xaaladihii ugu danbeeyey ee Abaaraha ka jira dalka.
Mudane Xasan Cali Kheyre ayaa kala hadlay Hay’addaha Qaramada Midoobey in la mideeyo isla markaana la isku dheeli-tiro habka gargaarka loo gaarsiinayo deegaanada abaaruhu ka jiraan, wuxuuna hordhigay dalab ah in UN-ku Dowladda Soomaaliya la wadaago macluumaadka abaaraha iyo isku duba ridka gargaarka.
Wuxuu u sheegay in loo baahan yahay dhammaan dhinacyada ku howlan gargaarka abaaraha inay midoobaan oo dowladda la shaqeeyaan si meelaha ugu daran ee u baahan gargaarka degdegga ah loogu guntado, maadaama ay jiraan dadaalo kale oo gurmad ah oo ay fidinayaan Guddiga Qaranka ee Gurmadka Abaaraha iyo hay’addo kale.
Ra’iisul Wasaaraha ayaa sidoo kale kulan gaar ah la qaatay Wakiilka Xoghayaha guud ee Qaramada Midoobey u qaabilsan Soomaaliya Michael Keating, waxayna isla soo qaadeen sidii Qaramada Midoobey ay gurmadku degdeg ugu gaari lahaa goobaha ay sida daran u saameysay Abaartu.
SAWIRRO
