Safiirkii ugu horeeyay ee si rasmi ah dowladda Mareykanka u soo magacawdo Soomaalia
ayaa maanta soo gaaray magaalada Muqdisho isagoo waraaqihiisa aqoonsiga u gudbiyay Wasiirka arrimaha dibadda Soomaaliya.
Safiirka cusub Stephen M. Schwartz oo dhowaan lagu dhaariyay magaalada Washington ayaa maanta waraaqihiisa aqoonsiga u gudbiyay wasiir C/salaam Hadliye Cumar, iyadoo lagu wado inuu isla maanta waraaqihiisa aqoonsiga si rasmi ah uga gudoomo madaxweyn Xasan Sheekh.
Mareykanka oo si buuxda u aqoonsaday dowladda aan KMG-ka ahayn ee Soomaaliya ayay muddo 3 sano ah ku qaadatay inuu Safiir rasmi ah u soo diro Soomaaliya, kadib markii safiir uu hore madaxweyne Obama ugu magacaabay Soomaaliya ay xilkaasi ka cudurdaaratay.
Safiirka cusub ee Mareykanka u fadhin doona Soomaaliya Ambassador Schwartz ayaa sheegay in danjire Mareykanku u soo magacaabo Soomaaliya ay calaamad u tahay xiriir xoog leh oo ka dhaxeeya labada dal, ayna fursad u tahay inuu Soomaaliya kala shaqeeyo dib u dhiska dalkoda.
Goobjooge.com
