Waxaa shalay magaalada London ee dalka Ingiriiska lagu aasay wiilkii Soomaaliga ahaa ee u geeriyooday cudurka Coronavirus, iyadoo aanay aaskiisa ka qeyb gelin qoyskiisa.

Ismaaciil Maxamed C/wahaab ayaa noqday qofkii ugu da’da yaraa ee cudurka Covid-19 ugu dhintay dalka Ingiriiska, waxaana qoyskiisa loo karaantiilay inay cudurka qabi karan, taasoo keenay inaan loo ogoleyn inay dibadda u baxaan, waxaana shalay la aasay wiilka iyadoo aanay qoyskiisa ka qeybgelin, waxayna ka daawanayeen khadka Internetka.

Hore waxay qoyskan u awoodi waayeen inay isbitaalka ugu tagaan, mana jirin cid wehlisay oo qoyskiisa ka mida markii uu geeriyoonayey, arrintaas oo saxaafadda Ingiriiska ay ku tilmaameen mid naxdin leh oo ka dhalatay cudurka coronavirus.

Aaska waxaa ka qeyb galay dad qaraabo la ahaa Ismaaciil, waxayna xirnaayeen qalabka looga hortago in cudurla isugu gudbiyo, waxayna salaadda janaasadda ku tukadeen iyagoo kala fog oo aan isu dhoweyn.