Shirkii labaad ee Wasaraadaha Dastuurka dowladda Federaalka ah iyo kuwa dowlad goboleedyada ayaa lagu gabagabeeyay magaalada Muqdisho.
Shirka oo socday muddo labo maalmood ah ayaa diirada lagu saaray xoojinta wadashaqeynta maamulada dalka iyo u diyaar garowga shirweyne Qaran ah oo bisha October ay qabaneyso Wasaaradda Dastuurka, kaasoo lagu daahfurayo ololaha dib u eegista dastuurka KMG ah ee dalka.
“Maanta wixii ka dambeeya, gaar ahaan bisha October wadahadalka dastuuriga ah, waxaan qabanqaabineynaa shirweyne Qaran oo ku saabsan arrimaha dastuurka” ayuu yiri Wasiir Xoosh.
Wasiirada Dastuurka Galmudug, Puntuland, Koofur Galbeed, Hirshabeelle iyo Agaasimaha guud ee Wasaaradda Dastuurka Jubbaland ayaa bogaadiyay dadaalada Wasaaradda Dastuurka Somaaliya ay ugu jirto qabyo tirka Dastuurka, ayna diyaar u yihiin inay la shaqeeyaan Wasaaradda.
Wasaaradda arrimaha dastuurka Somaaliya ayaa mudooyinkii dambe waday wada tashiyo la xiriira sida loo wajahayo dib u eegista Dastuurka, iyadoo Wasaaraddu horey u sheegtay in muddo labo sanno ah, ku soo gaba gabeyn doonto ololaha qabyo tirka Dastuurka.
