Waxaa maanta ka furmay Muqdisho shir la sheegay in looga hadlyo:
Xeerka nidaamka garsoorka,
Xeerka samaynta maxkamada dastuuriga ee dalka
iyo Qorshaha hirgelinta dib u howl galinta hay’adaha cadalaadda
Shirkan oo uu soo qabanqaabiyay wasiirka caddaaladda Faarax Sheekh C/qaadir ayaa la isugu yeeray dadweyne kala duwan oo sharci yaqaano iyo dad kale ka kooban sidal culimaa’diin iyo bulshada rayidka ah.
Waxay xogta Goobjooge.com sheegeysaa in shirkan ujeedka ugu weyn ee laga leeyahay uu yahay dhismaha maxkamadda Dastuuriga oo ah arrin muddo dheer hortaagneyd dowladda madaxweyne Xasan Sheekh, lagana cabsi qabay awoodda maxkamadaasi haddii la dhiso.
Wasiir Faarax ayaa u muuqada inuu mar kale u bareerayo arrin culus oo sharci ahaan aan isagu lahayn, kadib markii uu u guuleystay inuu Sharciga adeegga garsoorka marsiiyo Baarlamaanka. xilkana ka qaado xeer ilaaliyihii hore ee Qaranka iyo magacaabidda xeer ilaaliyaha cusub.
Arrinta shirka maanta loo furtay ee ah dhismaha maxkamadda Dastuurka ayaa waxaa gebi ahaanba leh oo howshaasi uu siinayaa dastuurka KMG ah ee dalka GOLAHA ADEEGGA GARSOORKA oo aan shirkani cidna ka joogin.
Lama oga sida Golaha adeegga garsoorka uga jawaabi doono arrintan laakiin golaha laf ahaantiisa ayaa fartu ku godan tahay. Waxayna tallaabadan cusub muujineysaa sida madaxweyne Xasan Sheekh iyo saaxiibadiis xilka la haya ay uga tumanayaan sharciga dalka.
