Baarlamaanka maamulka Koonfur Galbeed ayaa isku raacay in aakhirka sanadkan la qabto doorashada madaxweynaha Maamulkaasi.Kulan maanta ka dhacay Magaalada Baydhabo oo waqti dheer qaatay, laguna soo xiray kalfadhiga 4-aad ee Baarlamaanka Koonfur Galbeed ayaa lagu go’aamiyey xilliga ay dhaceyso doorashada madaxweynaha maamulkaasi oo waqtigiisa dhammaanayo.
Kulanka waxaa ka qeyb galay Madaxweynaha Koonfur Galbeed Shariif Xasan Sheekh Aadan oo isla maanta dib ugu laabtay magaalada Baydhabo, waxaana Baarlamaanka maamulka Koonfur Galbeed isku raacay in Bisha November 17 ee sanadkan 2018-ka ay dhacdo Doorashada Madaxtinimada maamulkaasi.
Xildhibaanada K/Galbeed ayaa cod gacantaag ahaa ku meel mariyay, waxaana u codeysay 110 xildhibaan, halka Saddex xildhibaan ayaa diiday. Shariif Xasan oo ay doorteen Ergo iyo Odayaal Dhaqameed ayaan magacaabin madaxweyne ku xigeen, waxaana Baarlmaanka hadda jira la filayaa inuu doorto madaxweynaha soo socda oo la sheegay in Shariifku u sharxan yahay mar kale.
