Wararka laga helayo magaalada Muqdisho ayaa sheegaya in iska hor imaad uu dhex maray Ciidamo kawada tirsan Dowladda Gaar ahaan Booliiska iyo kuwa xasilinta caasimadda.

Iska hor imaadka ayaa ka dhacay inta u dhaxeysa Isgoyska Howlwadaag iyo Saldhiga Booliiska Degmada Howl wadaag, waxaana la sheegay inay isku fara saareen labada ciidan oo kala shakiyey, iyadoo uu ku dhintay Askari katirsan Ciidamada Booliiska, halka uu ku dhaawacmay Askari kale oo katirsan Ciidamada Xasilinta.

Xilliga iska hor imaadka dhacay ayaa la sheegay in Gaadiid iyo dad badan ay ku sugnaayeen goobta is-rasaaseyntu ka dhacay, iyadoo qaarkoodna ay ciidamadu baaritaan ku hayeen, waxaana halkaasi ka dhacay kala carar, waxaana hakad galay isku socodka dadka iyo gaadiidka.

Wararka ayaa sheegaya in Ciidamo gurmad ah oo loo diray halkaasi ay gaareen, waxayna kala dhex galeen labada ciidan. Maydka Askariga ka tirsanaa Ciidamada Booliska Soomaaliya iyo Askariga kale ee dhaawacmay ayaa laga qaaday goobtii uu ka dhacay iska hor imaadka.