Wararka ka imaanaya magaalada Guriceel ee Gobolka Galgaduud ayaa sheegaya inuu halkaasi dagaal ku dhex maray askar ka kala tirsan ciidamada Soomaaliya iyo Booliska Maamulka Galmudug.
Dagaalkan oo hubka fudud iyo midka culus la isku adeegsaday ayaa dhex maray booliiska degmada Guriceel iyo ciidamada militariga ee Gorgor oo halkaas u tegay dagaalkii Ahlu suna.
Qasaaraha dagaalka ayaa hadda soo baxay, waxaana la xaqiijiyey inay ku dhinteen dagaalka laba qof oo lagu kala magacaabo Sadiiq Xaashi Indhabuur iyo Yusro C/laahi Axmed, iyadoo ay ku dhaawacmeen dhowr askari oo labada dhinac ah. Dagaalka ayaa salka ku haya xarigga askari ka tirsan ciidamada Gorgor.
Dagaalkan ayaa yimid kadib dagaal la mida oo isna ka dhacay magaalada Dhuusamareeb, waxaana muuqata in ciidamada milateriga dowladda Federaalka ay khalkhal amni ku hayaan magaalooyinka Galmudug
Magaalada Guriceel ayaa kasoo kabaneysay dagaallo qaraar oo bishii Oktoobar 2021 ku dhexmaray ciidamada dowladda Soomaaliya iyo kuwa Ahlu Sunna Wal Jamaaca.
