Guddoomiyihii hore ee Gobolka Banaadir Taabit Cabdi Axmed ayaa ku dhawaaqay inuu aqbalay xil ka qaadista uu ku sameeyay Madaxweyne Maxamed C/llaahi Farmaajo.

Shir jaraa’id oo uu caawa ku qabtay magaalada Muqdisho ayuu ka shaaciyey inuu soo dhoweynayo xilka laga qaaday, isla markaana uu xilku yahay meero, wuxuuna hambalyo u diray guddoomiyaha cusub ee xilka loo magacaabay C/raxmaan Cumar Yariisow.

Isagoo oo hadal qaaday xaaladda Muqdisho ayuu sheegay in xiisada siyaasadeed ay dhalisay in magaalada la geliyo xaalad kacsan oo amni lana xiro isu socodkii bulshada, wuxuuna ku baaqay in nabadda la sugo, shacabkana loo furo wadooyinka.

Wuxuu kaloo sheegay inaan loo baahneyn in la curyaamiyo howshii maamulka G/Banaadir oo ciidamada laga dul qaado, isagoo shacabka ugu baaqay inay nabadda ilaaliyaan oo aanay ku dhaqaaqin wax amni darro ah.