Guddoomiyeyasha labada Aqal ee Baarlamaanka Federaalka Soomaaliya Maxamed Mursal Sheekh iyo Cabdi Xaashi C/llaahi ayaa magaacabay guddi wadajir ah oo ka kooban labada aqal, kaasoo soo diyaarinaya xeerarka dhammeystirka Sharciga Doorashooyinka.

Guddigan oo ka kooban 17 xubnood (10 xildhibaan & Senator) ayaa laga rabaa inay soo diyaariyaan afar xeer oo ka jawaabaya su’aalihii ka dhashay Sharciga Doorashooyinka ee ay ansixiyeen labada Gole, isla markaana uu saxiixay Madaxweynaha Soomaaliya, su’aalahaas oo Beesha Caalamka ay dalbatay in laga heshiiyo oo degdeg loo caddeeyo.

Guddigan ayaa heysta muddo bil ah oo ay kusoo diyaariyeen xeerarkan saameynta ku leh doorashada 2020/2021, iyadoo kadibna la hor geyn doono kulan wadajir ah oo ay yeelan doonaan labada aqal ee Baarlamaanka.

Afarta xeer ee Guddigan laga rabo ayaa kala ah:

1- Xeerka Degaameynta Kuraasta

2- Xeerka xaqiijinta qoondada Haweenka

3- Xeerka Doorashada labada Aqal ee kasoo jeeda Gobollada Waqooyi (Somaliland)

4- Xeerka xuquuqda Metelaadda Gobolka Banaadir

HOOS KA AKHRISO