Qaar ka mida xildhibaannada Baarlamaanka Federaalka ayaa dood ka keenay heshiis ay Wasaaradda Waxbarashada Soomaaliya soo hordhigtay Golaha oo ku saabsan Axdiga 1954 ee ilaalinta Hanti-Dhaqameedka Xiliyada colaadaha iyo habraacyadiisa oo akhrinta koowaad la marsiiyey.

Kulankii maanta waxaa shir guddoomiyey guddoomiye ku-xigeenka koowaad C/weli Sheekh Ibraahim Muudey, ayey xildhibaannadu uga doodeen heshiiskan oo ay saxiixeen 82-dowladood, iyagoo qaarkood sheegay inuu ka hor imaanayo diinta islaamka, iyadoo ay ku jiraan qodobo u ogolaanaya dadka ajnabiga ah ee diimaha kale heysta, kuna nool dalka inay dhisan karaan Kaniisado.

Xildhibaannada qaarkood ayaa soo hadal qaaday Taallooyinka ay dowladda Soomaaliya dib u soo celisay ee magaalada Muqdisho, waxayna ku doodeen inaan loo eegin wax ay ka qabto diinta islaamka iyo inay ka faa’iideysan karaan kooxaha xagjirka ah.