Madaxweynayaashii hore ee dalka Shariif Sheekh Axmed iyo Xasan Sheekh Maxamuud oo hoggaaminaya Madasha Qaran ee Xisbiyada Mucaaradka ayaa maanta dib ugu laabtay magaalada Muqdisho, kadib socdaallo gaara oo ay dibadda ku maqnaayeen.

Sheekh Shariif oo gaaray dalka UK, ayaa halkaasi u tegay arrimo la xiriira waxbarasho uga socota Jaamcad, isagoo uga faa’iideysay shirar ay u qabteen Jaaliyadda Soomaaida ee dalkaasi, halkaasoo uu uga hadlay arrimo siyaasadeed, si weyna u cambaareeyay dowladda Soomaaliya. Dhinaca kale Xasan Sheekh Maxamuud ayaa arrimo u gaara ugu maqnaa dibadda.

Xildhibaannada kala taageera xisbiyada ay hoggaamiyaan madaxweynaaashii hore ee Himilo iyo UPD ayaa garoonka Muqdisho ku soo dhoweeyay, wuxuuna imaanshahooda caasimadda Muqdisho kusoo beegmay iyadoo uu sii xumaaday khilaafka dowladda Federaalka iyo maamul Goboleedyada iyo xaalad kacsan oo ka jirta Gobolka Gedo.