Faahfaahin dheeraad ah ayaa laga helayaa qarax saaka ka dhacay magaalada Muqdisho oo ahaa nooca lagu xiro Gaadiidka ee lagu beegsado shaqsiyaadka.

Qaraxan ayaa qabsaday Gaari uu watay mas’uul ka tirsan Xeer ilaalinta Maxkamadda Ciidamada Qalabka sida xilli uu ku sugnaa kontroolka laga ilaaliyo madaxtooyada Soomaaliya ee dhinaca Sayidka.

Qaraxa waxaa dhaawac culus uu kasoo gaaray Musharaf Mohamed Mo’allim oo ka mida saraakiisha Xeer ilaalinta Maxkamadda Ciidamada dowladda.

Xaaladda sarkaalkan ayaa la sheegay inay tahay mid culus, waxaana loola cararray isbitaal si xaaladiisa loola tacaalo.

Alshabaab ayaa sii kordhisay falalka beegsiga ah ee Khaarijinta Dad gaara, iyadoo ay muddooyinkii danbe sii yaraanayeen Qaraxyada gaadiidka lagu xiro.