Wararka laga helayo magaalada Muqdisho ayaa sheegay in qarax gaarigiisa loogu xiray uu ku dhintay mas’uul ka tirsanaa shaqaalaha Wasaarada Diinta iyo Awqaafta xukuumadda Soomaaliya.

Mas’uulkan oo lagu magacaabo Fu’aad Jaamac Salaad (Fu’aad Geelle) ayuu Qaraxan oo haleelay Gaarigiisa xili saaka uu marayey agagaarka Taallada Dajirka Dahsoon, degmada Boondheere ee magaalada Muqdisho, isagoo Gaariga ku waday dad ah ehel yihiin oo u dhoofi lahaa magaalada Hargeysa.

Maamulka Degmada Boondheere ayaa shaaciyay in dhowr qof loo xiray qaraxa lagu khaarijiyey mas’uulka ka tirsan Wasaaradda Diinta iyo Awqaafta, iyadoo uu ku jiro nin ilaalo ka ahaa Garaashka Gaariga qarxay lagu xareyan jiray.

Dhinaca kale Wasaaradda Awqaafta iyo Arrimaha Diinta Xukuumadda Soomaaliya ayaa cambaareysay falka lagu dilay Fu’aad Geelle, waxayna tacsi u dirtay dadkii uu ka baxay iyadoo dalbatay in cadaallada la hor keeno dadkii ka danbeeyay falkaasi.