Wararka laga helayo magaalada Jowhar ayaa sheegaya inuu halkaasi ka furmay kulan ay leeyihiin xildhibaanada Baarlamaanka maamulka Hirshabeelle.

Kulanoo ka furmay xarunta Shirarka Farjano oo lagu doortay madaxda Hirshabeelle, waxaa la filayaa in lagu furo Mooshinka ka dhanka ah Madaxweynaha Hirshabeelle Cali C/llaahi Cosoble.

Waxaa kulanka guddoominaya guddoomiye ku xigeenka labaad ee Baarlamaanka Canab Axmed Ciise, iyadoo ay xaadir yihiin xildhibaano tiradooda lagu sheegay 70 oo ah kooram iyo tiro xilka ka qaadi karta madaxweynaha.

Xil ka qaadista Madaxweynaha Hirshabeelle Cali Cosoble ayaa ui baahan 3/2 tirada xildhibaanada Baarlamaanka  Hirshabelle oo 99 xildhibaan ka kooban, waxaana xil ka qaadistiisa ay u baahan tahay 66 cod.

Ammaanka xarunta uu ka socdo kulanka baarlamaanka Hirshabeelle ayaa si weyn loo adkeeyay, waxaana lagu wadaa in cod loo qaado xil ka qaadista Cali C/llaahi Cosoble oo ku socda jidkii madaxweynihii hore ee Galmudug C/kariin Xuseen Guuleed.