Musharaxa uu wato madaxweynaha maamulka Koonfur Galbeed ee Soomaaliya Shariif Xasan Sheekh Aadan ayaa qarka u saaran inuu ku guuleysto xilka Guddoomiye ku xigeenka koowaad ee Baarlamaanka.
C/weli Ibraahim Muudey oo taageero ka helaya Shariif Xasan horena u ahaa gacanyaraha Shariifka ayaa u muuqda inuu ku soo bixi doono xilkan, kadib markii uu helay taageerada beelo iyo kooxo kala duwan oo diidan in Faarax C/qaadir ay awood ku yeeshaan Baarlamaanka.
Ololaha Shariifka waxaa aad uga weynaaday taageerada uu C/weli Muudey ka helayo mucaaradka madaxweyne Xasan Sheekh, taasoo laga yaabo inay salfato Faarax Sheekh C/qaadir.
Shariif Xasan oo ka haray musharaxnimada madaxweynaha kadib fashilkii musharixiisa C/rashiid Xiddig ayaa hadda u muuqda inuu ku ciil bixi doono guusha la filayo.
Dad badan ayaa saadaalinaya haddii aanay mucjiso kale dhicin in arrinta oo dhami u muuqato inuu xilkan ku soo bixi doono C/weli Muudey, waxaase laga deyrinayaa in guddoonka baarlamaanka uu noqon doono mid dhexdiisa isku mashquula marka ay isku jiiraan siyaasadaha iska horjeeda oo Jawaari iyo Shariif Xasan.
