Shirkii Madasha Qaran ee madaxda Soomaalida ayaa magaalada Muqdisho ka furmay, iyadoo ay ka qeyb galayaan madaxda Soomaalida.

Shirkan waxaa ku baaqay Beesha caalamka iyo ergeyga Qaramada Midoobay ee Soomaaliya Micheal Keating, waxaana ka qeyb galaya: Madaxweyne Xasan Sheekh Maxamuud, Guddoomiye Jawaari, Ra’iisul Wasaare Cumar C/rashiid, Ra’iisul wasaare ku-xigeenka, Madaxweynayaasha Koofur Galbeed, Galmudug, Jubbaland, Hirshabeelle iyo Madaxweyne ku-xigeenka Puntland.

Guddoomiyaha Guddiga Doorashada Dadban Cumar Maxamed Cabdulle (Dhagey) ayaa kulanka ka jeediyay warbixin ku saabsan xaaladda Doorashooyada iyo caqabadaha ka jira isagoo ugu baaqay madaxda Madasha inay xal degdeg ka gaaraan arrimaha taagan.

Waxaa isna shirka furay madaxweyne Xasan Sheekh Maxamuud oo Maamulada Jubbaland iyo Koofur Galbeed ku bogaadiyay dhameystirka doorashada xildhibaanada Aqalka Hoose, uguna baaqay maamulada kale inay soo dhameystiraan Doorashada.

Madaxda ku cusub shirka Madasha ee markii ugu horeysay ka qeyb galeysa waxaa ka mida: madaxweyne ku xigeenka Puntland C/xakiin Cumar Camey oo metelaya C/weli Gaas iyo madaxweynaha Hirshabeelle Cali C/llaahi Cosoble.

DAAWO SAWIRRO